Ўзбекистонлик пойгачи Италиядаги мусобақада муваффақият қозонди

Дам олиш кунлари давомида ўтган пойга жамоа учун осон кечмади. Саралаш баҳсларидаёқ экипаж ўз тезлигини намойиш этиб, поул-позицияни эгаллади ва машина юқори ўринлар учун курашишга тайёр эканини исботлади.

Биринчи пойгада Исмоил Ахмедхўжаев муваффақиятли старт олиб, пешқадамлар гуруҳида ҳаракатланаётган пайтда тўқнашувга учради. Бу эса GT Sprint мусобақаларининг нақадар мураккаб ва талабчан эканини яна бир бор кўрсатди.

Шунга қарамай, жамоа иккинчи пойгада кучли қайтишни амалга оширди. Ахмедхўжаев ва Русинов бошқарувидаги Rossa LM GT автомобили марра чизиғини биринчи бўлиб кесиб ўтиб, ғалабани қўлга киритди.

Шу тариқа, Rossa Racing жамоаси қийин кечган пойга ҳафталигини юқори натижа билан якунлаб, ўз характерини яна бир бор намойиш этди.

Маълумот учун, Ultimate Cup European Series — Европадаги машҳур автоспорт чемпионатларидан бири бўлиб, унинг таркибига бир нечта турли сериялар киради. Муджелло босқичида Ultimate GT Sprint Cup ҳам мусобақа дастуридан ўрин олган.