Ўзбекистонлик UFC собиқ жангчиси жароҳат туфайли фаолиятини якунлаши мумкин

Сўнгги бор ўтган йили жанг қилган Зарруҳ Адашев июнь ойида эълон қилган постида, сентябрь ёки декабрь ойларида навбатдаги жангини ўтказиши мумкинлигини айтган эди. Бироқ ҳамюртимизнинг маълум қилишича, унинг жанг қилишига жароҳат тўсқинлик қилмоқда:

"Бу 50 га 50 ҳолат. Менда жароҳат бор ва бу нерв тўқималарига таъсир қилиши мумкин экан. Шифокорнинг айтишича, агар мен декабрь ойида жанг қилиб, бошимга оғир зарба ўтказиб юборсам, фалаж бўлиб қолишим ҳам мумкин экан. Шунинг учун мен бу жангда таваккал қилгим келмади. Аввал шифокор билан жароҳат борасида яхшилаб гаплашиб, кейин карьерам бўйича қарор қабул қиламан. Агар спортни ташла, дейишса, ташлаш керак бўлади. Давом эттиравер дейишса, Ин Ша Аллоҳ давом эттираман. Кўрамиз. Тўғрисини айтсам, менинг ўзим яна жанг қилишни хоҳлайман", - деди Адашев.

Маълумот учун, Зарруҳ Адашев 2020-2022 йиллар оралиғида UFC'да тўртта жанг ўтказган ва уларнинг биттасида ғалаба қозонган, учта жангда мағлубият аламини тотиб кўрган. Шунингдек, Зарруҳ Адашев Bellator лигасида ҳам учта жанг ўтказиб, уларнинг барчасида зафар қучган.