08 май 10:58
Янгиликлар

Бокс/ММА

Ўзбекистонлик яна бир боксчи жаҳон чемпионлик камари учун жанг қилади

Ўта енгил вазн тоифасида WBO Oriental ҳамда WBO International камарлари соҳиби Олимжон Назаров тўлақонли жаҳон чемпионлиги учун рингга чиқади.

Бу ҳақда ҳамюртимизнинг ўзи Olamsport.com сайтига маълум қилди.

Назаров 5 май куни Корея Республикасида ўтказилган профессионал бокс оқшоми доирасида таиландлик Саравут Жиамтонг билан жанг қилиб, учинчи раундда нокаут орқали ғалаба қозонган ҳамда ўта енгил вазнда вакант бўлиб турган WBO International камарини қўлга киритган эди.

Боксчимизнинг сўзларига кўра, эндиликда у жорий йилнинг октябрь ойида WBO жаҳон чемпионлиги камари учун рингга кўтарилади. Ҳозирда бу камар вакант, яъни эгасиз қолган.

Маълумот учун, Назаров айни дамда WBO йўналиши бўйича чемпион бўлиб турган ягона ўзбекистонлик боксчи ҳисобланади.