"Ўзбекнефтгаз" футбол клубларини молиялаштиришни буткул тўхтатди. Ташкилот Ривалдо олдидаги қарзларни ҳам тўламайди

Бу ҳақда 20 апрель куни бўлиб ўтган матбуот анжуманида компания бошқаруви раисининг биринчи ўринбосари Суҳроб Ҳамроев маълум қилди, деб хабар бермоқда Gazeta.Uz мухбири.

Мутахассиснинг таъкидлашича, клубларни молиялаштиришни тўхтатиш жараёни босқичма-босқич эмас, балки бирданига амалга оширилган. Бунга қадар компания томонидан "Насаф", "Бухоро", "Бунёдкор", шунингдек, тизим корхоналари орқали "Машъал" ва "Шўртан" жамоаларини сақлаб туриш учун йилига ўртача 200–300 миллиард сўм ҳомийлик маблағлари йўналтириб келинган.

Шунингдек, анжуман давомида "Бунёдкор" жамоасида тўп тепган бразилиялик собиқ футболчи Ривалдо олдидаги 9,2 миллион евро миқдоридаги қарздорлик масаласига ҳам тўхталиб ўтилди. Суҳроб Ҳамроев ушбу қарзни узиш "Ўзбекнефтгаз"нинг эмас, балки бевосита клубнинг мажбурияти ҳисобланишини билдириб ўтди.

Эндиликда мамлакатимизда футбол клубларини молиялаштиришнинг янги модели жорий этилмоқда. Унга кўра, Суперлигада иштирок этаётган клубларни қўллаб-қувватлаш мақсадида давлат томонидан алоҳида жамғарма ташкил этилиб, 2026 йилда ҳар бир жамоага 35 миллиард сўмдан маблағ ажратилади.

Бундан ташқари, клублар учун даромад солиғи бекор қилиниб, ижтимоий солиқ ставкаси 1 фоиз этиб белгиланади ҳамда жамоаларни хусусийлаштирмоқчи бўлган тадбиркорларга имтиёзли кредитлар тақдим этилади.