ЎзДЖТСУ Беларус Миллий техника университети билан ҳамкорлик шартномаси имзолади

Унда ЎзДЖТСУ ректори М.Болтабаев, Илмий ишлар ва инновациялар бўйича проректор К.Баязитов, Халқаро ҳамкорлик бўлим бошлиғи Ш.Тоштурдиевлар иштирок этди.

7-11 декабрь кунлари Беларусда Миллий техника университетининг 100 йиллик юбилейи ҳам кенг нишонланмоқда, ҳамкорлик келишуви эса ушбу тадбир доирасида бўлиб ўтгани байрам кайфиятини янада кўтарилишига сабаб бўлди. Онлайн учрашувда Беларус Миллий техника университетининг 30дан ортиқ ҳамкор университети қатнашди.

Даставвал, Ўзбекистон давлат жисмоний тарбия ва спорт университети ректори М.Болтабаев Беларус Миллий техника университети ректори С.Харитончик ва университет жамоасига самимий табрик йўллади. Айни вақтда Беларус давлатида бўлиб турган университетнинг Ўзбек-Беларус қўшма «Жисмоний тарбия, спорт ва туризм» факультети декани Г.Асатова махсус совғани ҳамкор университет ректорига топширди. Ўқув юртининг келгусидаги илм соҳасида олиб бораётган ишларига омадлар тилади.

Сўнгра иккала томон онлайн форматда ҳамкорлик шартномасини имзолашди. Халқаро ҳамкорлик шартномасига кўра, энди икки давлат олий ўқув юртлари ўртасида «2+2» дастури асосида ҳам қўшма факультет ташкил этилади.

Шунингдек, онлайн тарзда икки томон ўртасида келгусидаги ҳамкорлик, лойиҳалар ва тадбирлар тўғрисида суҳбат бўлиб ўтди.

Маълумот учун, Ўзбекистон давлат жисмоний тарбия ва спорт университети шу кунга қадар 21та хорижий олий ўқув юрти билан ҳамкорлик шартномалари имзолаган эди. Энди уларнинг сони яна биттага кўпайди.