ЎзДЖТСУ илмий-амалий семинарга мезбонлик қилди

Ўзбекистон Республикаси Президентининг 2022 йил 3 ноябрдаги “Жисмоний тарбия ва спорт соҳасида кадрларни тайёрлаш ҳамда илмий тадқиқотлар тизимини янада такомиллаштириш чора-тадбирлари тўғрисида”ги ПҚ-414-сон, 2023 йил 7 апрелдаги “Оммавий ва профессионал футболни ҳар томонлама ривожлантиришнинг қўшимча чора-тадбирлари тўғрисида”ги ПҚ-115-сон қарорлари ҳамда 2023 йил 11 апрель кунида “Ёшлар сиёсати соҳасидаги ишлар натижадорлигини ошириш ҳамда улар билан ишлаш тизимини янада такомиллаштириш” юзасидан ўтказган видеоселектор йиғилиши ва 2023 йил 8 майдаги “2026 йил Ўзбекистонда бўлиб ўтадиган 46-Бутунжаҳон шахмат олимпиадасига комплекс тайёргарлик кўриш ҳамда шахматни оммавий ҳаракатга айлантиришга оид чора-тадбирлар тўғрисида”ги ПҚ-150-сон қарорида оммавий спорт турлари, жумладан баскетбол, волейбол, стол тенниси, шахмат ва футбол спорт турларини ривожлантириш ҳамда улар бўйича “Талабалар лигаси” спорт мусобақаларини ташкил этиш ва ўтказиш каби бир қатор мақсадли кўрсаткичлар белгилаб берилган.

Ана шу мақсадли кўрсаткичлар ижросини таъминлаш мақсадида Ўзбекистон давлат жисмоний тарбия ва спорт университетида Ўзбекистон Республикаси Олий таълим, фан ва инновациялар вазирлиги, Ўзбекистон Республикаси Ёшлар сиёсати ва спорт вазирлиги ҳамда спорт федерациялари вакиллари, республикадаги мавжуд олий таълим муассасалари проректорлари, спорт мураббийлари ва профессор-ўқитувчилар иштирокида “Талабалар лигаси” спорт мусобақаларини юқори савияда ташкил этиш ва ўтказиш бўйича Республика амалий-семинари бўлиб ўтди.

Семинар давомида олий таълим муассасаларида Жисмоний тарбия ва спорт кафедраларини ташкил этиш, Спорт клублар фаолиятини йўлга қўйиш, “Талабалар лигаси” спорт мусобақаларини ташкил этиш ва ўтказиш ҳамда давлат олий таълим муассасаларида 2023-2024 ўқув йили учун талабаларни талабалар турар жой билан таъминлаш бўйича олиб борилаётган ишлар, ўзаро ҳамкорлик алоқаларини йўлга қўйиш каби муҳим масалалар тўғрисида сўз борди ва улар бўйича устувор вазифалар белгилаб олинди.

Хусусан, охирги йилларда Республикада давлат ва нодавлат олий таълим муассаларининг сони ошгани, шу билан бирга мазкур олийгоҳларда фаолияти тўхтатилган жисмоний тарбия ва спорт кафедраларини тиклаш, мавжудларини замон талаблари асосида ривожлантириш, ўқув-методик адабиётлар билан таъминлаш масалаларига ечим изланди.

Шу билан бирга, жисмоний тарбия ва спорт соҳасида аҳоли соғлиғини мустаҳкамлашга кўмаклашадиган аниқ дастурларни амалиётга жорий этиш, ёшларни спортга кенг жалб қилиш ва улар орасидан иқтидорли спортчиларни саралаб олиш, спорт турлари бўйича юқори натижаларни таъминлайдиган маҳоратли спортчилар билан миллий терма жамоаларни шакллантириш ва тренерлар учун қўшимча шарт-шароитлар яратиш борасида тизимли ишларни ташкил этишга эътибор қаратилди.

Семинар якунида иштирокчилар олийгоҳнинг талабалар турар жойлари, спорт иншоотлари ва уларда яратилган шароитлар билан яқиндан танишдилар.

Илҳом Раҳмонов тайёрлади