ЎзДЖТСУ: Университетнинг халқаро алоқалари яна биттага ортди

Ташрифнинг асосий мақсади Ўзбекистон Республикаси Президенти Ш.М.Мирзиёевнинг 2019 йил 8 ноябрдаги “Ўзбекистон Республикаси олий таълим тизимини 2030 йилгача ривожлантириш концепциясини тасдиқлаш тўғрисида”ги Фармони ҳамда 2022 йил 3 ноябрдаги “Жисмоний тарбия ва спорт соҳасида кадрларни тайёрлаш ҳамда илмий тадқиқотлар тизимини янада такомиллаштириш чора-тадбирлари тўғрисида”ги Қарорида белгиланган бир қанча устувор вазифалар ижросини таъминлаш ҳамда университетнинг  халқаро алоқаларини янги босқичга олиб чиқиш ҳисобланади.

Дастлаб Корея Миллий спорт университети Президенти бошчилигидаги делегация вакиллари ва Ўзбекистон давлат жисмоний тарбия ва спорт университети раҳбарияти ўртасида учрашув ташкил этилди.

Унда Корея Миллий спорт университети Президенти жаноб Ёнгкю Аҳн ва унинг рафиқаси Ким Мира хоним, университет декани Хил Эун Баэ, Ўзбекистон давлат жисмоний тарбия ва спорт университети ректори, профессор Махмуджон Болтабаев, университет профессори Баек Мун Жонг, проректорлар, факультет деканлари, кафедра мудирлари ОАВ вакиллари ҳамда ёзги олимпия ўйинлари чемпионлари Акбар Жўраев, Руслан Нуридиновлар иштирок этишди. 

Учрашув давомида жисмоний тарбия ва спорт соҳасида илм-фан ва амалиётни интеграция қилиш, халқаро ҳамкорлик алоқаларини ривожлантириш, келажакда ўқув-машғулотларни илмий асосда ташкил қилиш ва мураббийлар малакасини ошириш ҳамда талабалар ва ходимлар алмашинуви каби долзарб масалаларда фикр-мулоҳазалар билдирилди. Ўз навбатида икки томон вакиллари ўзларини қизиқтирган саволларига атрофлича жавоб олишди.

Шундан сўнг, Ўзбекистон давлат жисмоний тарбия ва спорт университети ҳамда Корея Миллий спорт университети ўртасида халқаро муносабатларни ўрнатиш бўйича ҳамкорлик Меморандуми имзоланди.

Ташриф якунида фахрли меҳмонлар университет раҳбарияти бошчилигида олийгоҳ ҳудудидаги мавжуд спорт иншоотлари, профессор-ўқитувчилар ва талабалар учун яратилган шарт-шароитлар билан яқиндан танишишди.

Эслатиб ўтамиз, Корея Миллий спорт университети Президенти бошчилигидаги делегациянинг Ўзбекистондаги ташрифи Самарқанд вилоятидаги диққатга сазовор жойларини бориб кўриш билан ҳали давом этади.

Илҳом РАҲМОНОВ тайёрлади