ЎзДЖТСУда янги ўқув йили бошланди ФОТОГАЛЕРЕЯ

Университет раҳбарияти, Ўзбекистон Республикаси спорт вазирлиги масъуллари, Чирчиқ шаҳар ҳокимлиги ва жамоатчилик вакиллари, фахрий устозлар, профессор-ўқитувчилар, таниқли спортчи-талабалар ҳамда уларнинг ота-оналари иштирок этган тадбирда таъкидланганидек, Париж шаҳрида бўлиб ўтган 33-ёзги Олимпия ўйинларида спортчиларимиз қўлга киритган тарихий ғалабаларни алоҳида қайд этиш зарур. 

Cаккизта олтин, 2 та кумуш, 3 та бронза медалини қўлга киритиб, умумжамоа ҳисобида 13-ўринни эгаллашида спорт университети талаба-спортчиларининг, мураббийларнинг алоҳида ўрни борлиги, Ўзбекистон давлат жисмоний тарбия ва спорт университетининг ўқитувчи-мураббийлари ва талабалари хусусан, университет собиқ талабаси, бокс бўйича Ўзбекистон миллий терма жамоаси аъзолари Баҳодир Жалолов, Асадхўжа Мўйдинхўжаев, Абдумалик Халоқов, Диёра Келдиёрова, Музaффaрбек Тўрабоев, мураббий Фаррух Қиличевнинг камолотга эришишида ушбу даргоҳнинг ўрни беқиёслиги айтиб ўтилди.

Шунингдек, университет талаба-ёшлари учун зарур шарт-шароитлар яратилганлиги, 2156 ўринга мўлжалланган талаблар турар жойи, маданият саройи, турли спорт машғулотларига мўлжалланган мажмуалар ёшлар ихтиёрига топширилганлиги ўқув йили мазмунли ўтишидан далолатлиги, бу, давлатимиз томонидан ёшларга кўрсатилаётган ғамхўрлик эканлиги билдирилди.

Чирчиқ шаҳар ҳокими М. Абдураҳимов, Ўзбекистон давлат жисмоний тарбия ва спорт университети ректори, профессор Р. Маткаримов ва бошқалар янги ўқув йилида талаба-ёшларни чуқур билимга, спорт кўникмаларига эга бўлиш асносида ўз мутахассисликлари бўйича малакали мутахассис бўлиб етишиб чиқиши ҳамда келгусидаги фаолиятида улкан ютуқлар ёр бўлишини тилашди. 

Тадбир давомида университетда узоқ йиллар самарали меҳнат қилган ва доимий изланишда бўлган бир қатор профессор-ўқитувчилар ҳамда мураббийларга илмий даража ва унвонлар топширилди.