ЎзДЖТСУда янги ўқув йили бошланди. Исроил Мадримов фалсафа фанлари доктори!

Маросимни университет ректори Рашид Маткаримов очиб бериб, янги ўқув йили остонасида турган талабаларни самимий муборакбод этди.

Ректор ўз табригида талабалик — инсон ҳаётидаги энг унутилмас ва масъулиятли даврлардан бири эканини таъкидлаб, ёшларни билим олишга, изланишга, спорт билан шуғулланишга, Ватанга садоқат билан хизмат қилишга ҳамда университет шаънини муносиб ҳимоя қилишга чорлади.

Тантанали маросимда университетнинг фахрий устозлари билан бир қаторда, Ўзбекистон Республикаси Спорт вазирлиги бўлим бошлиғи Муқум Арзиқулов, Пекин-2008 ёзги Олимпия ўйинлари кумуш медали совриндори, “Ўзбекистон ифтихори” фахрий унвони соҳиби Абдулла Тангриев, Сидней-2000 Олимпия ўйинлари бронза медали совриндори, “Ўзбекистон ифтихори” Рустам Саидов, WВА йўналишида собиқ жаҳон чемпиони, “Дўстлик” ордени соҳиби Исроил Мадримов ҳамда бошқа таниқли спорт юлдузлари иштирок этдилар.

Меҳмонлар талаба-ёшларни янги ўқув йилининг бошланиши билан самимий муборакбод этиб, уларга таълим ва келгуси фаолиятида улкан муваффақиятлар, илмий изланишларида юксак натижалар ҳамда спортда янги зафарлар тиладилар.

Шундан сўнг университетнинг бир гуруҳ профессор-ўқитувчиларига Турон фанлар академиясининг академиги фахрий унвонлари ҳамда илмий даража ва илмий унвонлар тантанали равишда топширилди. Илмий унвон олганлар орасида Исроил Мадримов ҳам бор. У педагогика фанлари бўйича фалсафа доктори илмий даражаси ҳамда доцент унвонига эга бўлди.