Озодбек Жаҳон чемпионлиги учун гиламга чиқади, яна икки курашчимизда бронза учун имконият бор

Бугун жаҳон чемпионатининг сўнгги куни юнон-рум кураши баҳсларида ғолиб ва совриндорлар номи маълум бўлади. Бугун Олимжон Қурбонов ва Бахтиёр Сайфиев мураббийлигидаги 3 нафар классигимиз жаҳон чемпионати медаллари учун гиламга чиқади.

Қувонарлиси, кечаги саралаш беллашувларида муваффақиятли иштирок этган Озодбек Халимбоев финал йўлланмасини қўлга киритди. 45 кг вазн тоифасидаги курашчимиз 1/8 финалда исроиллик Амаре Фетенени 7-0, 1/4 финалда арманистонлик Левон Мартиросянни 6-0, 1/2 финалда эса грузиялик Анри Хозреванидзени 11-0 ҳисобида доғда қолдирди. Бугун у жаҳон чемпионатининг олтин медали учун украиналик Никита Дементьевга қарши гиламга чиқади. 

60 кг вазндаги курашчимиз Азизбек Йўлдошев бронза медали йўлидаги ўтиш беллашувида россиялик Абдулла Салимов, 92 кг вазн тоифасидаги Жавлон Тиркашев эса Вишал Вишал (Ҳиндистон) - Актан Сазикбаев (Қирғизистон) баҳси ғолиби билан учрашади. Тиркашев бўлажак рақибини мағлуб эта олса, бронза медали учун россиялик Тимур Чернишевга қарши баҳс олиб боради.