Пара Осиё ўйинлари. Иккинчи кунни юқори нотада бошладик

Ўзбекистон терма жамоасининг матонатли спортчилари мусобақанинг иккинчи кунги баҳсларини сермаҳсуллик билан бошлашди. Қандайдир бир соат ичида 3 та олтин ва 3 та кумуш медаль қўлга киритилди.

Пара каноэ бўйича эркаклар ўртасида KL3 классида ҳамюртимиз Ҳасан Қўлдошев 42.258 сония натижа билан маррага биринчи бўлиб етиб келди ва терма жамоамизга бугунги куннинг илк олтин медалини тақдим этди. 

Пара каноэ бўйича аёллар ўртасида KL3 классида ўтказилган баҳсларда Шаҳноза Мирзаева 50.680 сония натижа билан делегациямиз ҳисобига иккинчи олтин медални қўшиб қўйди. 

Эркаклар ўртасида VL3 классида ўтказилган мусобақада эса Ҳайтмурод Шерқўзиев 49.345 сония натижа билан навбатдаги олтин медалга эга чиқди. 

Пара енгил атлетиканинг аёллар ўртасида F13 классида найза улоқтириш дастурида иштирок этган ҳамюртимиз Нозимахон Қаюмова 43.36 метр натижа билан кумуш медални қўлга киритди.

Пара енгил атлетиканинг аёллар ўртасида F56 классида найза улоқтириш дастурида юртимиз шарафини ҳимоя қилган Наталия Семёнова 17.40 метр натижа билан кумуш медалга сазовор бўлди. 

Пара енгил атлетиканинг F54 классида аёллар ўртасида ядро улоқтириш дастурида қатнашган Нурхон Қурбонова эса 7.34 метр натижа билан кумуш медални ўзиники қилди.