Пара пауэрлифтинг ва пара енгил атлетикачиларимиз кунни юқори нотада якунлашди

Жумладан, эркаклар ўртасидаги -59 кг вазн тоифасида Одилжон Якубов 115 кг тошни бўйсундирган ҳолда биринчи ўринни эгаллади. Аёллар ўртасида ғолиблик шоҳсупасига кўтарилган -45 кг вазн тоифасидаги юртдошимиз Дилдора Нуриллоева 35 кг тошни кўтарган бўлса, яна бир чемпионимиз -55 кг вазн тоифасида мусобақада қатнашган Озода Олимова 55 кг натижа қайд этди.

Пара енгил атлетика баҳсларида ҳам медаллар қўлга киритилди. Эркаклар ўртасида F46 классида найза улоқтириш бўйича 42.45 метр натижа кўрсатган ҳамюртимиз Фурқат Неъматов бронза медалига сазовор бўлган бўлса, F34 классида аёллар ўртасида диск улоқтириш бўйича Диёра Анварова кумуш медални қўлга киритди.

Кечаги натижалардан сўнг делегациямиз ҳисобидаги медаллар сони 16 тага етди. Шулардан 9 таси олтин, 2 таси кумуш ва 5 таси бронза медалларидир.