Паралимпия ўйинлари чемпиони Бухорода тантанали кутиб олинди + ФОТО

Шу муносабат билан Бухоро давлат университетида тадбир ташкил этилди. Унда вилоят ҳокимлиги вакиллари, мураббийлар, спортчилар ҳамда кенг жамоатчилик вакиллари қатнашди.

Тадбирда сўз олганлар юртимиз байроғини жаҳон узра баланд кўтарган матонатли ва ватанпарвар фарзандни тарбиялаганликлари учун унинг ота-онаси ва мураббийларига алоҳида миннатдорлик билдирди. 

– Ўғлим юрт байроғини кўкларга кўтарди ва унинг шарафига мадҳиямиз янгради, – дейди Насим Тешаев. – Бу ғалаба Янги Ўзбекистонники, бу ғалаба юртдошларимизники. 

Шунингдек, чемпион ва унинг яқинлари ҳам сўзга чиқиб, Президентимизнинг спортга қаратаётган эътибори, Ватанимиз шуҳратини нуфузли мусобақаларда кенг тараннум этиш учун спортчиларга яратаётган шароитлар учун ўз миннатдорликларини билдирди. 

Маълумот учун, Париж паралимпия ўйинларининг пара дзюдо бўйича эркаклар ўртасида J2 классида 60 кг вазн тоифасидаги баҳсларда юртимиз шарафини ҳимоя қилган бухоролик Шерзод Намозов олтин медал учун кечган финал баҳсида грузиялик Зураб Зурабианни мағлуб этиб икки карра Паралимпия ўйинлари ғолиби деган шарафли номга сазовор бўлди.