Паралимпия ўйинлари йўлланмасини қўлга киритган спортчиларимизга 100 млн сўм топширилди

Токио-2020 Паралимпия ўйинларига йўлланма берувчи мазкур мусобақа Ўзбекистон терма жамоаси учун ҳам муваффақиятли ўтиб, унда вакилларимиз Паралимпия ўйинларига 3 та йўлланмани қўлга киритишди.

Жаҳон чемпионатида Шаҳноза Мирзаева KL3 йўналишида олтин медаль ва Паралимпиада лицензияси, Азизбек Абдулҳабибов ҳамда Ҳайитмурод Шерқўзиев совринли ўринларга илина олишмаган бўлишса ҳам, Паралимпия ўйинларига йўлланма берувчи поғонада финишга етиб келишган эди. 

Ўзбекистон Миллий Паралимпия ассоциациясида Токио-2020 Паралимпия ўйинларига йўлланма қўлга киритган спортчилар ва уларнинг мураббийларини тақдирлаш маросими бўлиб ўтди. 

Унда Жисмоний тарбия ва спорт вазирининг биринчи ўринбосари Ойбек Касимов, МОҚ вице-президенти Сакен Полатов, МОҚ президенти маслаҳатчиси Назиржон Худойқулов, Паралимпия ассоциацияси раҳбари Мухторхон Тошхўжаев ва ОАВ вакиллари иштирок этишди. 

Тадбирда Ойбек Касимов ва Сакент Полатов сўзга чиқиб, Президентимиз томонидан қаратилаётган бундай эътибор спортчиларнинг янги ғалабаларига пойдевор бўлишини таъкидлаб, уларнинг келгусидаги фаолиятида ҳам омад ва зафарлар тилаб ўтишди. 

Паралимпия ассоциацияси раҳбари Мухторхон Тошхўжаев эса қуйидаги фикрларни билдириб ўтди:

“Аввало, сизларнинг жаҳон чемпионатида қайд этган натижангиз билан муборакбод этаман. Биз сизлар билан фахрланамиз ва сизлар бизнинг фахримизсиз. Шуғулланишларингиз учун етарли шарт-шароитлар яратиб бераётган ҳукуматимизга ҳам ташаккур айтиб ўтмоқчиман. Умид қиламизки, Токио Паралимпиадасидан бундан ҳам юқори натижалар билан қайтиб, Ватанимиз довруғини янада юксакларга кўтарасизлар”. 

Белгиланганидек, Паралимпия ўйинларига йўлланма олган спортчиларимиз 100 миллион, уларнинг мураббийларига эса 50 миллион сўм миқдорида мукофот пуллари топширилди.