Париж UFC Fight Night 258 турнирининг бонус соҳиблари эълон қилинди

UFC матбуот хизмати ушбу турнирнинг бонус соҳибларини эълон қилди. Финишлар сони кўплиги сабаб ташкилотчиларга кафолатланган гонорардан ташқари қўшимча 50 минг долларлик мукофот пули соҳибларини аниқлаш қийин бўлди. 

Иккинчи раундда бразилиялик Маурисио Руффини бўғиб қўйган Бенуа Сен-Дени тўртта бонусдан бирига эга чиқди. Айнан Руффи енгил вазн тоифасининг келажаги сифатида қаралаётганди. Франциялик аралаш яккакураш устаси эса ўз ватандошлари кўз ўнгида уни муддатидан аввал таслим этди. 

Шунингдек, Мэйсон Жонс, Анте Делия ва Кауи Фернандес ҳам 50 000 долларлик чекни қўлга киритишди. Париж турнирида октагонга чиққан россиялик ягона жангчи Ринат "Гладиатор" Фахретдинов 54 сонияда швециялик Андреас Густафссонни нокаутга учратди. Лекин унга бонус насиб қилмади.