07 сен 15:22
Янгиликлар

Бокс/ММА

Пэдди Пимблетт потенциал рақибларини айтди

UFC енгил вазн тоифасида вақтинчалик чемпионлик камари учун собиқ даъвогар Пэдди Пимблетт ўзининг навбатдаги рақиби дивизионнинг собиқ чемпиони Илия Топурия бўлиши мумкинлиги ҳақидаги миш-мишларга изоҳ берди.

Аввалроқ, Шон О`Мэллининг мураббийи Тим Уэлч ушбу жанг ташкил этилаётгани ҳақида хабар берганди.

"Мен Илиянинг бошини узиб ташлашни жуда хоҳлардим, лекин нима бўлишини кутиш керак. Мен билан бу ҳақда ҳеч ким гаплашмади. Мен Арман, Гэтжи, Руффи ёки Чарльз Оливейра билан жанг қилишим мумкин. Вариантлар кўп. Агар бу йил яна октагонга чиқсам, умид қиламанки, бу декабрь ойида бўлади", – деди британиялик енгил вазнли жангчи ўз интервьюсида.

Жорий йилнинг январь ойида Пэдди Пимблетт UFC енгил вазн тоифасида вақтинчалик чемпионлик камарини қўлга киритиш учун муваффақиятсиз уринишни амалга оширганди. Ўшанда у ҳакамларнинг якдил қарори билан Жастин Гэтжига имкониятни бой берган эди. Июль ойида эса британиялик жангчи муваффақиятли йўлга қайтиб, Бенуа Сен-Денини 52 сония ичида бўғиш усули билан таслим этди.

Июнь ойида бирлаштирувчи жангда Гэтжига кутилмаганда мағлуб бўлган Илия Топурия эса яқинда уч ойлик сукунатни бузиб, мағлубияти ҳақида батафсил гапириб берди ва октагонга қайтиш ниятида эканлигини маълум қилди.

12 декабрь куни Лас-Вегасда UFC 335 турнири бўлиб ўтади, у дунёнинг энг кучли лигасининг жорий йилдаги якуний рақамли мусобақаси бўлади.