Пеле ва Марадона чемпионликни нишонлаган, томи тўлиқ йиғиладиган, 1,4 млрд долларга тушган лойиҳа: Ўзбекистоннинг тарихий учрашувларига мезбонлик қиладиган 3 стадион

Ўзбекистон гуруҳдаги дастлабки ўйинини Мексикада, қолган иккитасини АҚШда ўтказадиган бўлди. Бугун айнан шу 3 та стадион ҳақида маълумотларни тақдим этамиз. 

Айтиш жоиз, энг катта масштабдаги мусобақа 3 мамлакатнинг 16 та локацияда ўтказилади. 104 ўйиндан биринчисига эса Мексика мезбонлик қилади. Мезбон Мексика турнирни ўз пойтахтида, 1970 ва 1986 йилларда Жаҳон чемпионати финаллари ва очилиш ўйинларига мезбонлик қилган "Ацтека" тарихий стадионида очиш шарафига муяссар бўлади. Эътиборлиси, очилиш учрашуви 2010 йил Жарда бўлгани каби Мексика ҳамда Жанубий Африка Республикаси ўртасида кечади. ЖЧ илк туридан ўрин олган Ўзбекистон – Колумбия тўқнашуви ҳам шу ерда ўтади. 

"Ацтека" — дунёдаги энг катта футбол стадионларидан бири бўлиб, Мексика пойтахти Мехико шаҳрида жойлашган. Унинг сиғими 87 523 томошабинга тенг. Бу Лотин Америкасидаги энг катта стадион, дунёда бешинчи энг катта стадион ва футбол мусобақалари учун махсус мўлжалланган дунёдаги энг катта стадиондир. "Ацтека" денгиз сатҳидан 2200 метрдан юқори баландликда жойлашган. Бу — ФИФА Жаҳон чемпионати финал ўйинини икки марта ўтказган иккита стадиондан бири (Бразилиянинг "Маракана" стадиони билан бирга).

"Ацтека" — Мексиканинг асосий стадиони, бу ерда миллий терма жамоа 1966 йилдан бери уй ўйинларини ўтказиб келади.

Мексика ЖЧ-2026да гуруҳ босқичидаги учта ўйинининг барчасини ўз мамлакатида ўтказади. Шулардан иккитаси "Ацтека"да, биттаси "Акрон"да бўлиб ўтади.

1-ўйин | Гуруҳ босқичи (Мексика – ЖАР) | 12 июнь

24-ўйин | Гуруҳ босқичи | (Ўзбекистон – Колумбия) | 18 июнь

53-ўйин | Гуруҳ босқичи (Конго ДР/Ямайка/Янги Каледония – Мексика) | 25 июнь

79-ўйин | 1/16 финал | 1 июль

92-ўйин | 1/8 финал | 6 июль

Жаҳон футболининг ҳақиқий колизейи ва учинчи ФИФА Жаҳон чемпионатига мезбонлик қилаётган биринчи стадион, 1970 ва 1986 йилларда иккита ҳаяжонли Жаҳон чемпионати финалида Пеле ва Диего Марадона каби афсоналарга қувонч улашган "Мехико Сити" ("Ацтека"нинг бошқа номи – таҳр.) стадиони яна бир бор биринчи планга чиқади.

"Ацтека" 2011 йилги ФИФА U-17 Жаҳон чемпионати финалига мезбонлик қилди, унда нуфузли ёшлар турнири тарихидаги ҳар қандай ўйин учун рекорд даражадаги 98 943 нафар мухлис тўпланди. 

1968 йил "Ацтека" 119 853 томошабинни ҳам бағрига сиғдира олгани ҳар қандай одамни ҳайратга солади.

"Ацтека" ҳақида қизиқ фактлар:

- 1968 йил Олимпиадаси фонида қурилган.

- "Ацтека" номини қадимий ацтек цивилизациясига боғлаб қўйишган.

- Стадион Мексиканинг рамзларидан бирига айланиб улгурган.

- Пеле ва Марадона афсона мақомини шу ерда олган десак бўлаверади. 1970 йил Пеле учинчи ЖЧ титулини қўлга киритган, 1986 йил Марадонага тегишли "Худонинг қўли" ва "Аср голи" айнан "Ацтека"да урилган.

- Денгиз сатҳидан 2200 м баландликда барпо қилинган.

- U2 ва Coldplay рок гуруҳлари, Майкл Жексон ва Пол Маккартни каби юлдузлар концерт берган.

Ўзбекистон МТЖнинг 2-тур доирасидаги Португалия билан учрашуви Хьюстон шаҳридаги "Эн-ар-жи Стэдиум"да ташкил этилади. 

Илгари "Релайант Стэдиум" номи билан танилган "Эн-ар-жи Стэдиум" (NRG Stadium) АҚШнинг Техас штатидаги Хьюстон шаҳрида жойлашган кўп функцияли спорт мажмуасидир. 2002 йилда барпо этилган стадионнинг футбол ўйинлари учун сиғими 71 000 томошабиндан ошади. 2002 йил 24 августда очилган стадион томи йиғиладиган биринчи NFL стадионига айланди. Бу — NFL жамоаси "Хьюстон Тексанс"нинг уйи.

Стадионда кўплаб халқаро футбол ўйинлари, жумладан, АҚШ терма жамоаси иштирокидаги ўйинлар бўлиб ўтган. Шунингдек, у родеолар ва чорвачилик шоуларига ҳам мезбонлик қилган.

2004 йил 1 февралда стадионда XXXVIII Супербоул ва 2009 йил 5 апрелда XXV Рестлмания, 2017 йил 5 февралда эса Супербоул LI мусобақалари ўтказилган.

Ёзда "Эн-ар-жи Стэдиум"да КОНКАКАФ Олтин Кубоги финали бўлиб ўтди. Унда Мексика АҚШни 2:1 ҳисобида мағлубиятга учратди.

"Эн-ар-жи Стэдиум" ҳақида қизиқарли фактлар: 

- АҚШдаги NFL ареналари орасида биринчи бўлиб тўлиқ йиғиладиган (retractable) томга эга стадион.

- Хьюстоннинг энг катта тадбир майдони.

- Хьюстон ҳавоси жуда иссиқ бўлгани учун стадионнинг томи махсус энергияни тежайдиган ва иссиқликни қайтарувчи материалдан тайёрланган.

- АҚШдаги энг машҳур Houston Livestock Show and Rodeo тадбири ўтадиган маскан. Арена бир неча соат ичида футбол майдонидан улкан родео майдонига айлана олади.

- Майдон чими спорт турига қараб, хилма-хил конфигурацияларда ёпилиб-очилади.

Стадионда бўлажак мундиалнинг умумий 7 та учрашуви ўтказилиши режалаштирилган: 

10-ўйин | Гуруҳ босқичи (Германия – Кюрасао) | 15 июнь

23-ўйин | Гуруҳ босқичи (Португалия – Конго ДР/Ямайка/Янги Каледония) | 18 июнь

35-ўйин | Гуруҳ босқичи (Нидерландия – Украина/Швеция/Польша/Албания) | 21 июнь

47-ўйин | Гуруҳ босқичи (Португалия – Ўзбекистон) | 24 июнь

65-ўйин | Гуруҳ босқичи (Кабо-Верде – Саудия Арабистони) | 27 июнь

76-ўйин | 1/16 финал | 30 июнь

90-ўйин | 1/8 финал | 5 июль

Фабио Каннаваро шогирдларининг гуруҳдаги сўнгги баҳси Ўзбекистон МТЖга яхши таниш бўлган ўша муҳташам "Мерседес-Бенц Стэдиум"да бўлиб ўтади. Терма жамоа 2023 йил бу ерда Мексикага қарши халқаро ўртоқлик учрашуви ўтказган ва мағлубиятга рози бўлмаганди.

Мексика – Ўзбекистон 3:3  

АҚШ. Атланта, "Мерседес Бенц" стадиони.

Голлар: Рауль Хименес 21', 80', Уриэль Антуна 88' – Бобир Абдихолиқов 18', Азиз Турғунбоев 45+1', Отабек Шукуров 90+1'

Мексика: Очоа, Альварес, Васкес, Сепулведа, Ангуло, Э.Альварес, Родригес, Пинеда, Уэрта, Альварадо, Хименес.

Ўзбекистон: 1.Ўткир Юсупов, 4.Фарруҳ Сайфиев, 7.Отабек Шукуров, 9.Одил Ҳамробеков, 10.Жалолиддин Машарипов (21.Аброр Исмоилов, 80), 15.Умар Эшмуродов, 17.Бобир Абдихолиқов (11.Остон Ўрунов, 70), 18.Абдулла Абдуллаев, 19.Азиз Турғунбоев, 22.Дилшод Саитов (13.Шерзод Насруллаев, 46), 23.Ҳусниддин Алиқулов.

Огоҳлантиришлар: Хесус Ангуло 26, Ҳусниддин Алиқулов 38, Жилберто Сепулведа 57, Хорди Кортизо 77, Шерзод Насруллаев 87.

"Мерседес-Бенц Стэдиум" — АҚШнинг Жоржия штати Атланта шаҳридаги спорт стадиони. 2017 йилдан бери у "Атланта Фэлконс" (Америка футболи) ва "Атланта Юнайтед" (футбол) жамоаларининг уй стадиони ҳисобланади.

2012 йил 10 декабрда Жоржия Жаҳон конгресс-маркази маъмурияти "Атланта Фэлконс" жамоаси стадиони лойиҳасини бир овоздан маъқуллади. Стадион 2017 йилги мавсумдан олдин очилиши режалаштирилган. 

2013 йил 19 мартда Атланта шаҳар кенгаши стадионни расман маъқуллаган. 2014 йил 19 майда қурилиш бошланишига бағишланган расмий маросим бўлиб ўтган. Маросимда Атланта мэри Касим Рид иштирок этган. 2015 йил 24 августга келиб янги стадион "Мерседес-Бенц Стэдиум" деб номланиши эълон қилинган. Титул ҳомийси Mercedes-Benz USA билан тузилган шартномага кўра, арена очилганидан кейин 25 йил давомида (2042 йилгача) шу номда қоладиган бўлган. Қурилиш тахминан 1,4 миллиард долларга тушган. 

Футбол ўйинлари учун стадион 42 500 томошабинга мўлжалланган. Америка футболи ўйинлари учун сиғими эса 71 000 томошабинни ташкил қилади (75 000 гача кенгайтириш мумкин).

Режалаштирилганидек, стадион 2017 йил 26 августда очилган. "Атланта Фэлcонс" янги аренадаги биринчи ўйинини мавсум олдидан "Аризона Кардиналс"га қарши олиб борган. 

Дунёдаги энг ажойиб стадионлардан бири бу йил 1 июндан 13 июлга қадар ФИФА Клублар ўртасидаги ЖЧнинг 6 та ўйинига мезбонлик қилди. ПСЖ ва "Манчестер Сити" бу ерда йирик ғалабага эришган бўлса, "Бавария" мусобақадан чиқиб кетган эди.

"Мерседес-Бенц Стэдиум" ҳақида қизиқ фактлар:

- Камера линзасига ўхшаш "мураккаб том"га эга. 8 қанотли том камера объективидек айланиб очилади. Унинг тўлиқ очилишига 7–8 дақиқа вақт кетади, дунёда бундай механизм йўқ.

- Стадионнинг панорамали экрани мавжуд бўлиб, бу энг катта доирасимон LED таблодир. Унинг умумий узунлиги 335 метрдан ошади.

- Дунёдаги илк "zero-waste" стадионлардан бири бўлиб, аренада чиқиндиларнинг 90 фоизи қайта ишланади. Бу уни экология жиҳатидан энг илғор ареналардан бирига айлантиради.

- "Fan First Pricing" дастурига кўра, бу ерда хот-дог, попкорн, сув ва газланган ичимликлар АҚШдаги бошқа стадионларга нисбатан 40–60% арзон.

- Чим, ўриндиқлар конфигурацияси ва майдон белгилари 48–72 соатда тўлиқ ўзгаради. 1 ҳафта ичида ҳам NFL, ҳам MLS ўйинларини ўтказиш имкони бор.

- Дунёдаги энг йирик Wi-Fi тармоқларидан бири мавжудлиги боис интернет билан қандайдир муаммо кузатилиши имконсиз.

Стадион ички қисмида 180 дан ортиқ санъат асари жойлашган — бу Америкадаги энг катта спорт-санъат коллекцияларидан бири.

"Мерседес-Бенц Стэдиум"да мундиалнинг 8 та учрашуви ташкил қилинади:

14-ўйин | Гуруҳ босқичи (Испания – Кабо-Верде) | 16 июнь

25-ўйин | Гуруҳ босқичи (Дания/Шимолий Македония/Чехия/Ирландия – ЖАР) | 19 июнь

38-ўйин | Гуруҳ босқичи (Испания – Саудия Арабистони) | 22 июнь

50-ўйин | Гуруҳ босқичи (Марокаш – Гаити) | 25 июнь

72-ўйин | Гуруҳ босқичи (Конго ДР/Ямайка/Янги Каледония – Ўзбекистон) | 28 июнь

80-ўйин | 1/16 финал | 2 июль

95-ўйин | 1/8 финал | 8 июль

102-ўйин | Ярим финал | 16 июль

Шерзод Нурматов