Пешқадам ютқазди, Гулруҳбегимда ғалаба

Аёллар ўртасида ўтказилаётган мусобақанинг еттинчи турида халқаро гроссмейстеримиз Гулруҳбегим Тоҳиржонова ниҳоят ғалаба қозонди. У ўтган турда мағлубият аламини тотиб кўрганди. Биринчи аёл гроссмейстеримиз Нафиса Мўминованинг синглиси бўлган Гулруҳбегим қозоғистонлик Амина Каирбековани мағлуб этди. 

Кутилмаганда мусобақада якка пешқадамлик қилаётган Нилуфар Ёқуббоева оқ доналарда ҳаракат қилганига қарамай, яна бир гроссмейстеримиз Сарвиноз Қурбонбоевага имкониятни бой бериб қўйди. Шахматчимизнинг бу қоқилишидан қозоғистонлик Бибисара Ассаубаева унумли фойдаланиб қолди. У ватандоши Гулмира Даулетовани таслим этди ва пешқадамга айланиб олди. 

Турнир жадвалида Бибисара Ассаубаева 5,5 очко билан биринчи ўринни эгаллаб турибди. Нилуфар Ёқуббоева ва рейтинг пешқадами Гулруҳбегим Тоҳиржонова ҳисобида 5 очкодан бор. Тўрт яримтадан очко эга бўлиб турган қозоғистонлик Гулисхан Нахбаева ва гроссмейстеримиз Сарвиноз Қурбонбоева кейинги ўринларни банд этишган. 

Бугун саккизинчи турда карвонбоши Бибисара Ассаубаева ҳамюрти Гулисхан Нахбаевага қарши қора доналарда ўйнайди. Иккинчи тахтада Сарвиноз Қурбонбоева ва Гулруҳбегим Тоҳиржонова ўзаро тўқнаш келишади. Бугун соат 14:00да бошланадиган тур турнир жадвалида кўп нарсага ойдинлик киритади.