Poland Open. Тўрт "классигимиз" шоҳсупада, Баҳромов чемпион! (ФОТОГАЛЕРЕЯ)

Poland Open рейтинг турнирида Ўзбекистон терма жамоаси ҳам муваффақиятли иштирок этди. Бироз аввал якунланган юнон-рум курашчилар мусобақасида тўрт нафар полвонимиз ғолиб ва совриндорлар сафидан жой олди. 

60 кг вазн тоифасида юртимиз шарафини ҳимоя қилган Ислом Баҳромов финалда япониялик Аята Сузукини 5-3 ҳисобида мағлуб этиб, Poland Open турнири чемпионига айланди. У финалга қадар Майрбек Салимов (Польша), Кристиан Кечкемети (Венгрия)ни мос равишда 6-0 ва 7-0 ҳисобида мағлубиятга учратган эди. 

72 кг вазнда гиламга чиққан юртдошимиз Мирзобек Раҳматов финалга қадар мағлубиятсиз етиб бориб, кумуш медални қўлга киритди. Раҳматов мезбонлар вакили Геворг Сахакянга бир очко фарқи билан ютқазиб қўйди. 

Терма жамоамизга яна иккита бронза медалини Муҳаммадқодир Юсупов (60 кг) ва Рустам Ассакалов Рустам (87 кг) тақдим этди. Ҳар иккала юнон-рум курашчимиз ҳам бронза медали учун кечган беллашувларда польшалик атлетлардан устун келишди. 

Шу тариқа, Равшан Рўзиқулов бошчилигидаги Ўзбекистон юнон-рум кураши терма жамоаси Poland Open турнирини 2 та олтин, 1 та кумуш, 4 та бронза медали билан якунланди. Кеча юнон-рум курашчиларимиздан Жалгасбай Бердимуратов олтин, Елмурат Тасмурадов ва Мўминжон Абдуллаев бронза медалига сазовор бўлишганди. 

Варшавадаги халқаро турнирни бошлаб берган эркин курашчиларимиз эса биттадан олтин, кумуш ва бронза медалини қўлга киритишган эди. Токио Олимпиадаси лицензианти Ғуломжон Абдуллаев чемпионлик шоҳсупасига кўтарилган бўлса, Рашид Қурбонов кумуш, Маҳмуд Шавкатов бронза медалига эга чиққанди.