Пойтахтимиз мезбонлигида ўтадиган Ҳарбийлар ўртасидаги 42-Жаҳон чемпионати олдидан матбуот анжумани ташкил этилди

Бироз аввал ушбу нуфузли мусобақага бағишланган матбуот анжумани бўлиб ўтди. 

Унда Халқаро спорт Кенгаши (CISM) Спорт директори Ян Ван ден Дул, CISM аъзоси генерал майор Олег Ботсман, CISM Дзюдо бўйича спорт комиссияси президенти генерал Фаршад Нажафипур, Ўзбекистон Республикаси Мудофаа вазири ўринбосари, мамлакат дзюдо федерацияси ўринбосари Алишер Нарбаев, федерация бош котиби Азиз Собиров ва бошқа мутасаддилар иштирок этишди.  

Маълумки, Халқаро спорт Кенгаши (CISM) мунтазам равишда бир нечта спорт тури бўйича турли даражадаги мусобақалар, хусусан жаҳон чемпионатларини ўтказиб келяпти. Жумладан, ташкилот томонидан шу кунгача дзюдо бўйича 41 та жаҳон чемпионати ташкил этилган. 

2021 йил Франция, ўтган йили эса Доминикан Республикаси дунё биринчилигига мезбонлик қилди. Тошкент шаҳри мезбонлигида ўтказиладиган жаҳон чемпионаида сайёрамизнинг 5 қитъаси 30 дан ортиқ мамлакатида келган 400 нафарга яқин ҳарбий дзюдочилар етиб келди.  

Спикерлар ўз йўналишларида жаҳон чемпионатига олиб борилган тайёргарликлар бўйича атрофлича маълумот беришди. Режа бўйича 16-17 октябрь кунлари яккалик мусобақасида жаҳон чемпионати ғолиб ва совриндорлари аниқланади. 18 октябрда аралаш жамоавий баҳслар ташкил этилади ҳамда шу куннинг ўзида жаҳон чемпионатининг тантанали ёпилиш маросими ўтказилади. Яккалик баҳсларида жами 18 нафар дзюдочимиз жаҳон чемпионати медаллари учун татамига чиқади.     

Маълумот учун, ўтган йили 24 июль - 1 август кунлари Доминикан Республикасининг Санто-Доминго шаҳрида ўтган жаҳон чемпионатида Ўзбекистон терма жамоаси 2 та олтин ва 2 та кумуш медаль билан умумжамоа ҳисобида кучли тўртликдан жой олганди. Ўшанда дзюдочиларимиздан Мусо Собиров (-81 кг) ва Муҳаммадкарим Ҳуррамов (+100 кг) чемпионлик шоҳсупасига кўтарилганди.