Пойтахтимизда француз бокси САВАТ бўйича нуфузли мусобақа бўлиб ўтди ФОТОГАЛЕРЕЯ

Мусобақанинг асосий мақсади ёшлар ўртасида соғлом турмуш тарзини тарғиб қилиш, болаларни оммавий спортга жалб қилиш, мамлакатимизнинг халқаро нуфузини ошириш ва спорт орқали миллатлар ўртасида дўстона муносабатларни ривожлантиришдир.

“Сават” спорт турининг мамлакатимизда ривожланиб бораётганига кўп бўлгани йўқ.

Ўзбекистон француз бокси “Сават” ассоциацияси 2019 йилнинг 11 октябрида Ўзбекистон Республикасида давлат рўйхатидан ўтган ва мана шу қисқа  вақт ичида САВАТнинг “Ассо” ва “Комба” йўналишлари бўйича 3 маротаба Ўзбекистон чемпионати ҳамда 4 маротаба Ўзбекистон кубоги мусобақалари ўтказилди. Энг кучлилар француз бокси “Сават” бўйича Ўзбекистон миллий терма жамоасига қабул қилинди. 

Спортчиларимиз 2021 йили Сербиянинг Рума шаҳрида ёшлар ўртасидаги Жаҳон чемпионати ҳамда кадетлар ўртасидаги Жаҳон кубогида илк бора иштирок этиб, 2 та олтин ва 2 та бронза медалини қўлга киритишди. 

2022 йилнинг 10-15 январь кунлари Бангладешнинг Дакка шаҳрида бўлиб ўтган III Осиё чемпионатида 3 та олтин ва 3 та кумуш медаллари бизнинг спортчиларга насиб этди. 2022 йил 29 апрелдан 1 майга қадар Болгариянинг Пловдив шаҳрида бўлиб ўтган Халқаро чемпионатда ҳам 7 та олтин, 5 та кумуш ва 2 та бронза медали қўлга киритилди. 

Энг муҳим натижалардан яна бири Италиянинг Милан шаҳрида ўтган мусобақаларда катталар ўртасида илк бор иштирок этган миллий терма жамоамиз 2 та бронза медалини қўлга киритди. Шу тарзда ҳозир ўзбекистонлик спортчилар ҳисобида жами 12 та олтин, 8 та кумуш ва 6 та бронза медаллари бор.

Халқаро “Сават” Федерацияси билан изчил ҳамкорлик олиб борилаётганлиги ҳамда тренер ва ҳакамлар учун халқаро семинарлар ташкил этилаётганлиги натижасида ўзбекистонлик мураббийларнинг ҳам тажрибаси ортиб бормоқда.

“Универсал” спорт саройида ўтказилаётган IV-Осиё чемпионати ҳамда II-Осиё очиқ кубоги мусобақаларида эса 11та давлатдан келган 200 нафарга яқин ҳаваскор спортчилар “САВАТ”нинг “АССО” йўналиши бўйича ғолиблик учун кураш олиб борди. Мусобақалар ўсмирлар, ёшлар ҳамда катталар ўртасида ўтказилди.   

IV-Осиё чемпионати ҳамда II-Осиё очиқ кубоги доирасида “САВАТ” Конфедерацияси конференцияси ҳам ўтказилди. 

Алимурод МАМАДАМИНОВ, ўз мухбиримиз