Prague Masters. Абдусатторов пешқадамга қарши матч ўтказди

Мазкур шахмат фестивали тоифасига қараб учта гуруҳда ташкил этилмоқда. Кучлилар жам бўлган "Masters" гуруҳида ўзбекистонлик гроссмейстерлар — Нодирбек Абдусатторов ҳамда Нодирбек Якуббоев ҳам бош соврин йўлида баҳс олиб бормоқда ва бу борада Абдусатторовнинг чемпионлик имконияти юқорироқ бўлиб турибди.   

Еттинчи турда Нодирбек Абдусатторов оқ доналарда мусобақа пешқадами нидерландиялик Йорден ван Форестга қарши баҳс олиб борди ва якунда дуранг билан кифояланди. Агар ғалаба қозонганида, турнир жадвалида пешқадамга айланиб оларди. Нодирбек Якуббоев эса бу турда қора доналарда ҳиндистонлик Аравиндҳ Читамбарам билан муроага келди. 

Еттинчи турдан сўнг Йорден ван Форест 5 очко билан ҳамон якка пешқадамлигини сақлаб қолди. Абдусатторов 4,5 очко билан иккинчи ўринни банд этган. Чехиялик Давид Навара ҳисобида ҳам 4,5 очко бор. Бугун 8-турда Нодирбек қора доналарда айнан Наварага қарши баҳс олиб боради. Уч очко билан 8-ўринда бораётган Якуббоев эса бугун оқ доналарда эронлик Парҳам Мақсудлу билан ҳисоб-китоб қилади.