Prague Masters. Абдусатторов яқин таъқибчисини мағлуб этди ва яна пешқадамга айланди

Мазкур шахмат фестивали тоифасига қараб учта гуруҳда ташкил этилмоқда. Кучлилар жам бўлган "Masters" гуруҳида ўзбекистонлик гроссмейстерлар — Нодирбек Абдусатторов ҳамда Нодирбек Якуббоев ҳам бош соврин йўлида баҳс олиб бормоқда ва бу борада Абдусатторовнинг чемпионлик имконияти анча юқори бўлиб олди.   

Қувонарлиси, саккизинчи турда Нодирбек Абдусатторов қора доналарда ўйнади ва энг яқин таъқибчиси чехиялик Давид Наварани чиройли усулда мағлубиятга учратди. Баҳс олдидан ҳар икки шахматчи 4,5 тадан очко жамғариб, турнир жадвалида иккинчи ва учинчи ўринларни банд этиб турганди. Учрашув дурангга қараб кетаётган бир пайтда мезбон шахматчи бландер, яъни қўпол хатога йўл қўйди ва бундан Нодирбек усталик билан фойдаланиб кетди.  

Абдусатторов ўта муҳим ғалабаси эвазига 5,5 очко билан яна мусобақа пешқадамига айланиб олди. Бунга шу кунгача карвонбоши бўлиб келган нидерландиялик Йорден ван Форестнинг оқ доналарда ўйнашига қарамай, кутилмаганда ҳиндистонлик Аравиндҳ Читамбарамга ютқазиб қўйгани сабаб бўлди. 

Бу турда Нодирбек Якуббоев оқ доналарда эоронлик Парҳам Мақсудлу билан дурангга имзо чекди. Саккиинчи турдан сўнг Йорден ван Форест 5 очко иккинчи ўринга тушди. Бугун ўтказиладиган сўнгги 9-турда Абдусатторовни дуранг натижа ҳам чемпионга айлантиради. У бугун оқ доналарда америкалик Ҳанс Мок Ниеманнга қарши баҳс олиб боради. Якуббоев қора доналарда германиялик Винсент Кеймер билан ҳисоб-китоб қилади. Уч ярим очкога эга Якуббоев турнир жадвалида 7-ўринга кўтарилди. Чемпионликдан умидини узмаган Йорден ван Форест қора доналарда Парҳам Мақсудлу билан ўйнайди.