Prague Masters. Бугун Чехияда "Нодирбеклар дербиси" бўлиб ўтади

Мазкур шахмат фестивали тоифасига қараб учта гуруҳда ташкил этилмоқда. Кучлилар жам бўлган "Masters" гуруҳида ўзбекистонлик гроссмейстерлар — Нодирбек Абдусатторов ва Нодирбек Якуббоев ҳам бош соврин йўлида баҳс олиб бормоқда.  

Қизиғи шундаки, бугун олтинчи турда улар ўзаро тўқнаш келишади. Якуббоев оқ доналарда ҳаракат қилади. Ўзаро учрашувларда Нодирбек Якуббоев яхшироқ натижага эга бўлиб турибди. У 4 та партияда ғалаба қозониб, 10 тасида дуранг қайд этган. Абдусатторов эса Якуббоевни 2 та учрашувда таслим эта олган. Бугун уларнинг 17-учрашуви бўлиб ўтади.  

Бешинчи турда гроссмейстерларимиз турлича натижа қайд этишганди. Абдусатторов оқ доналарда ҳиндистонлик амалдаги жаҳон чемпиони Гукеш Доммараджуни яна бир бор мағлуб этишни уддалаган бўлса. Якуббоев аксинча, қора доналарда чехиялик Давид Наварага ютқазиб қўйганди. 

Бугунги тур олдидан Нодирбек Абдусатторов 3,5 очко билан қўшимча кўрсаткичларга кўра иккинчи ўринни эгаллаб турибди. Чехиялик Давид Навара ҳисобида ҳам 3,5 очко бор. Якуббоев эса 2 очко билан еттинчи поғонадан жой олган.