Prague Masters. Чехияда "Нодирбеклар дербиси" бўлиб ўтди. Бугун Абдусатторовни чемпионлик матчи кутмоқда

Мазкур шахмат фестивали тоифасига қараб учта гуруҳда ташкил этилмоқда. Кучлилар жам бўлган "Masters" гуруҳида ўзбекистонлик гроссмейстерлар — Нодирбек Абдусатторов ҳамда Нодирбек Якуббоев ҳам бош соврин йўлида баҳс олиб бормоқда ва бу борада Абдусатторовнинг имконияти юқорироқ бўлиб турибди.   

Қизиғи шундаки, олтинчи турда улар ўзаро тўқнаш келишди. Оқ доналарда ҳаракат қилган Якуббоев дуранг натижа қайд эта олди. Ўзаро учрашувларда айнан Нодирбек Якуббоев яхшироқ натижага эга бўлиб турганди. У 4 та партияда ғалаба қозониб, 10 тасида дуранг қайд этганди. Кеча 11-муросага келинди. Абдусатторов эса Якуббоевни 2 та учрашувда таслим эта олган. Кеча уларнинг 18-учрашуви бўлиб ўтди.  

Бугунги тур олдидан Нодирбек Абдусатторов 4 очко билан қўшимча кўрсаткичларга кўра ҳамон иккинчи ўринни эгаллаб турибди. Чехиялик Давид Навара ҳисобида ҳам 4 очко бор. Якуббоев эса 2,5 очко билан еттинчи ўриндан саккизинчи поғонага тушди. Бу турда чехиялик Давид Навара билан дуранг ўйнаган нидерландиялик Йорден ван Форест якка пешқадамлигини сақлаб қолди. Унинг ҳисобида 4,5 очко бор. 

Эътиборлиси, бугун 7-турда Нодирбек Абдусатторов оқ доналарда ван Форестга қарши баҳс олиб боради. Агар ғалаба қозонса, биринчи ўринга кўтарилиб олиш баробарида чемпионлик сари катта қадам ташлайди. Якуббоев эса бугун 7-турда ҳиндистонлик Аравиндҳ Читамбарамга қарши қора доналарда ҳаракат қилади.