President's Cup. Истомин 1345-ракеткага ютқазди, Дўстов ҳам

Мукофот жамғармаси 40 минг АҚШ долларини ташкил этувчи мусобақада уч нафар теннисчимизнинг ҳам ўз имкониятини синаб кўраётгани ҳақида хабар берган эдик. Санжар Файзиев 2 соату 3 дақиқа давом этган баҳсда россиялик Александр Згировскийга 6/4, 1/6, 2/6 ҳисобида ютқазиб қўйганди. 

Файзиевдан кейин узоқ йиллар мамлакатимизнинг биринчи ракеткаси бўлиб келган Денис Истомин ҳамда ёш теннисчимиз Мустафо Дўстов ҳам мағлубиятга учраб, мухлислар сафидан жой олди. 

Дунёнинг 740-ракеткаси бўлиб турган Истомин саралаш баҳсларига имтиёзли йўлланма асосида қўйилган қозоғистонлик Арсланбек Айткуловга 2/6, 4/6 ҳисобида имкониятни бой бериб қўйди. Айткулов ATP рейтингида 1345-поғонада бормоқда. Денис эса саралашнинг 8-рақамли теннисчиси сифатида сараланган эди. 

ATP рейтингининг 1552-поғонасидан жой олган Мустафо Дўстов эса дунёнинг 665-ракеткаси, ҳиндистонлик Ники Пуначага 3/6, 2/6 ҳисобида мағлуб бўлди. Дўстов биринчи сетнинг учинчи геймидан сўнг 3/0 ҳисобида олдинга чиқиб ҳам олганди.