Prezident Cup. Бош совринни Ўзбекистонда олиб қололмадик, Синдаров иккинчи бўлди

Дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этган Prezident Cup мусобақаси бош соврини учун баҳс олиб боришди. Якунда бош соврин Ниҳал Саринга насиб этди. Ҳиндистонлик гроссмейстер чемпионлик ўйинида Нодирбек Абдусатторов билан дуранг ўйнади ва 7,5 очко жамғарган ҳолда чемпионга айланди.  

Ҳамюртимиз Жавоҳир Синдаров иккинчи ўринни эгаллади. У бугун 9-турда ҳиндистонлик Нилаш Саҳани таслим этди. Агар Жавоҳир бир тур олдидан Ниҳал Саринга ютқазмаганида айнан у турнир чемпиони бўлар эди. Саидакбар Сайдалиевдан устун келган турнирнинг иккинчи рақамли иштирокчиси эронлик Парҳам Мақсудлу 7 очко билан қўшимча кўрсаткичларга кўра учинчи ўринни банд этди. Мусобақанинг биринчи тартиб рақамли шахматчиси Нодирбек Абдусатторов 6,5 очко жамғарди ва 5-ўрин билан кифояланди.