Президент Кубоги. Икки гроссмейстеримиз Топ-3`да. Шахматчиларимиз 7-турда қандай натижа қайд этишди?

Мусобақада дунёнинг турли мамлакатларидан келган гроссмейстерлар бош соврин учун баҳс олиб боришяпти. Ҳиндистонлик Ниҳал Сарин (2701) турнирда биринчи рақам остида сараланган. У кеча ўтказилган 7-турда эронлик гроссмейстер Данишвар Бардияни мағлубиятга учратиб, турнир жадвалида 5 очко яна пешқадам бўлиб олди. Ниҳални 6-турда мағлуб этиб, катта шов-шув кўтарган Муҳиддин Мадаминов (2552) бу сафар қора доналарда германиялик Фредерик Свэн (2653)га имкониятни бой бериб қўйди. 

Ўзига хос ўзбек дербисида Шамсиддин Воҳидов оқ доналарда ўйнаганига қарамай, кутилмаганда Абдималик Абдисалимовга ютқазиб қўйди. Бунинг ортида пешқадамликни Ниҳал Саринга топширди. Абдисалимов турнирдаги илк ғалабасини қўлга киритди. Еттинчи турда россиялик Александр Гришук украиналик Юрий Кузубовни таслим этди. Франциялик Максим Лагарде ва арманистонлик Шант Саргсян партиясида дуранг натижа қайд этилди. 

Бугун 8-тур учрашувлари ўтказилади. Соат 15:00`да бошланадиган турнинг марказий учрашуви Шамсиддин Воҳидов ва Ниҳал Сарин ўртасида бўлиб ўтади. Агар Воҳидов бугун ғалаба қозона олса, чемпионлик сари жуда катта қадам ташлайди. Муҳиддин Мадаминов Максим Лагардега, Абдималик Абдисалимов Александр Гришукка қарши баҳс олиб боради.