Prezident Kubogi. Икки Нодирбек ғалаба билан бошлади. Қолган шахматчиларимизда қандай натижа? + ФОТО

Тўққиз кун давомида дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Kubogi мусобақаси бош соврини учун ўзаро баҳс олиб боришади. Иштирокчилар FIDE рейтингидаги ўринларига қараб А ва В гуруҳларида дона суришяпти.  

Кучлилар жам бўлган А гуруҳи баҳсларида юртимиз шарафини Нодирбек Абдусатторов, Жавоҳир Синдаров, Шамсиддин Воҳидов, Нодирбек Якуббоев сингари таниқли гроссмейстерларимиз ҳимоя қилишмоқда. Абдусатторов (2777) халқаро турнирнинг биринчи рақамли иштирокчиси сифатида сараланган бўлиб, 1-турда қора доналарда ҳиндистонлик Самбит Панда (2380)ни мағлубиятга учратди. 

Иккинчи рақамли шахматчи Парҳам Мақсудлу (Эрон, 2712) оқ доналарда хитойлик Жанг Зижидан устун келди. Унинг ҳамюрти Амин Табатабайи учинчи рақам остида таснифланган бўлиб, қозоғистонлик Меруерт Камелединова билан муросага келди.    

Нодирбек Якуббоев қора доналарда ҳаракат қилганига қарамай, қирғизистонлик Мелис Маматовни таслим этди. Жавоҳир Синдаров россиялик Екатерина Голцевани мағлубиятга учратди. Шамсиддин Воҳидов ҳиндистонлик Ваз Этан билан дуранг ўйнади.