Президент Кубогининг 2-тур барча партиялари бир хил натижа билан якунланди

Мусобақада дунёнинг турли мамлакатларидан келган гроссмейстерлар бош соврин учун баҳс олиб боришяпти. Ҳиндистонлик Ниҳал Сарин (2701) турнирда биринчи рақам остида сараланган бўлиб, у 1-турда германиялик Фредерик Свэнни мағлубиятга учратганди.

Мусобақада бешинчи рақам остида сараланган ҳамюртимиз Шамсиддин Воҳидов (2641) ҳам ўз иштирокини ғалаба билан бошлаб олганди. Гроссмейстеримиз франциялик Максим Лагарде (2608 )ни оқ доналарда таслим этган эди. 

Яна бир ёш гроссмейстеримиз Муҳиддин Мадаминов (2552) ҳам илк турда зафар қучганди. У блиц бўйича уч карра жаҳон чемпиони, турнирнинг учинчи сараланган шахматчиси, россиялик Александр Гришукдан устун келганди. Гроссмейстеримиз Абдималик Абдисалимов (2561) эса иккинчи сараланган иштирокчи, арманистонлик Шант Саргсян (2665)га имкониятни бой берган эди. 

Президент Кубогининг 2-тур барча учрашувлари дуранг натижа билан якунланди. Шамсиддин Воҳидов қора доналарда украиналик гроссмейстер Юрий Кузубов, Муҳиддин Мадаминов қора доналарда Шант Саргсян, Абдималик Абдисалимов эса оқ доналарда Фредерик Свэн билан муросага келди. 

Учинчи тур олдидан турнир жадвалида Шант Саргсян, Муҳиддин Мадаминов, Шамсиддин Воҳидов, Ниҳал Сарин ва эронлик Данешвар Бардия 1,5 очкодан жамғариб, пешқадамлик қилишяпти. Қолган барча иштирокчилар ҳисобида 0,5 очкодан бор. 

Бугун 3-турда ўзбек дербисига гувоҳ бўламиз. Муҳиддин Мадаминов оқ доналарда Абдималик Абдисалимовга қарши дона суради. Шамсиддин Воҳидов эса блиц бўйича уч карра жаҳон чемпиони Александр Гришук билан ўйнайди.