Президент соврини учун ўтказилаётган мусобақанинг очилиш маросими бўлиб ўтди

Тадбирда Халқаро кураш ассоциацияси раҳбари Комил Юсупов, жисмоний тарбия ва спорт вазирининг биринчи ўринбосари Ойбек Қосимов, Бухоро вилояти ҳокими Ўктам Барноев, Халқаро кураш ассоциацияси президенти Комил Юсупов, спортчи ва мураббийлар, оммавий ахборот воситалари ходимлари ва бошқалар иштирок этишди.

Очилиш маросимида сўзга чиққан жисмоний тарбия ва спорт вазирининг биринчи ўринбосари Ойбек Қосимов турнир иштирокчилари қутлар экан, шундай деди:

“Муҳтарам Президентимиз томонидан халқимизнинг кўп йиллик қадриятларидан бири бўлган ўзбек курашини ривожлантириш, унинг жаҳон миқёсидаги нуфузини оширишга катта эътибор қаратилмоқда. Илк марота ўтказилаётган ушбу турнир ҳам миллий курашимиз довруғини дунёга янада кенг ёйишига умид қилиб қоламиз”- деди у.

Жисмоний тарбия ва спорт вазирлиги, Бухоро вилоят ҳокимлиги, Миллий олимпия қўмитаси, Ўзбекистон Кураш федерацияси, Халқаро кураш ассоциацияси, Ўзбекистон ёшлар иттифоқ ҳамкорлигида ўтказилаётган турнирга Афғонистон, Озарбайжон, Тожикистон, Туркманистон, Қирғизистон, Қозоғистон, Голландия, Португалия, Гонконг, Ҳиндистон, Эрон каби 20 га яқин мамлакатларнинг энг кучли полвонлари ташриф буюришди.

Бугун, 9 июнь куни старт олган беллашувларда эркаклар 60, 66, 73, 81, 90, 100 кг.гача ва 100 кгдан юқори вазн тоифаларида, аёллар 52, 63 ва 78 кг вазн тоифаларида ғолиблик учун гиламга тушишяпти.

Эслатиб ўтамиз, мусобақада ўз вазн тоифаларида 1-ўринни қўлга киритган полвонлар 3000 АҚШ доллари, 2-ўрин соҳиблари 2000 АҚШ доллари ҳамда 3-ўринга сазовор бўлган полвонлар эса 1000 АҚШ доллари миқдоридаги пул мукофотлари билан ҳам тақдирланади.