Про лига. Бугун Фарғонада чемпионлик ўйини!

Фарғонадаги "Истиқлол" стадионида пешқадам "Нефтчи" иккинчи ўриндаги "Турон"ни қабул қилади.

"Нефтчи" биринчи ўринда қолиши учун ғалаба ёки дуранг кифоя қилади. "Турон" эса биринчи ўринга чиқиши учун фақат ғалаба зарур.

Эслатиб ўтамиз, Про лигада биринчи ўринни олган клуб 2021 йилги Суперлигага йўлланмани қўлга киритади. Иккинчи ўрин соҳиби эса Суперлигада 13-ўринни эгаллаган клуб билан плей-офф баҳсини ўз майдонида ўтказади.

Бу мавсум ушбу клублар ҳозирга қадар ўзаро учта ўйин ўтказишди. 7-тур доирасида ўтган "Турон" - "Нефтчи" учрашувида 1:1 ҳисоби қайд этилган. Меҳмонлар ҳужумчиси Достонбек Тошматовнинг голига мезбонлар сафида Асилбек Қаюмов жавоб берганди.

14-тур доирасида кечган "Нефтчи" - "Турон" ўйини ҳам 1:1 ҳисоби билан тугаган. Бу сафар яйпанликлар вакили Суннат Эрматов ҳисобни очган, сўнгги дақиқаларда Санжар Зокиров ҳисобни тенглаштирганди.

Иккинчи босқич доирасидаги "Турон" - "Нефтчи" баҳсида меҳмонлар зафар қучишган. Миржалол Неъматов ва Достонбек Тошматовнинг голларига мезбонлар жавоб бера олишмаган - 0:2.

Про лига, 20-тур.
НЕФТЧИ – ТУРОН
1 декабрь 2020 йил. Фарғона. "Истиқлол" стадиони. 14:00 (Футбол ТВ LIVE)
Ҳакамлар: Шавкат Насибуллаев, Ришат Нугманов, Дониёр Сайлавов
Назоратчи: Игорь Нехочин
Комиссар: Шоҳруҳ Саид.