«Проф боксдан қайтиб, бундай чиройли жанг қилишини кутмагандим» – Ҳасанбой Дўсматов – Сакен Бибосинов тўқнашуви ҳақида боксимиз юлдузлари қандай фикрда?

Белградда давом этаётган жаҳон чемпионатидаги дунё бокс мухлислари ва мутахассисларининг кўплаб баҳс-мунозараларига сабаб бўлган Ҳасанбой Дўсматов ҳамда Сакен Бибосинов ўртасидаги жанг тўгрисида ўзбек бокси мутахассиларининг фикрларига қизиқдик.

Фарруҳ Қиличев – терма жамоа мураббийи

«Мени фикримча, Ҳасанбой жангни тоза ютди. 1-2 раундда ката устунлик қилди. Бошқа ҳеч қандай гап-сўз бўлиши мумкин эмас».

Фазлиддин Ғоибнзаров – профессионал боксчи

«Жангни тўлиқ кўрдим . Шахсий фикримча, Ҳасанбой енгилгани йўқ. Озгина ҳакамларнинг хатоси бўлди, деб ўйлайман. Дўсматов - тажрибали, Олимпиада чемпиони, ҳакамлар томонидан ҳар томонлама бу жангга профессионал даражада эътибор берилиши керак эди. Аввало, қуръанинг ўзи хато бўлган. Иккита кучли, номдор боксчи илк босқичданоқ тўқнаш келиб қолган. Ҳаммаси яхшиликка, шундай бўлиши керак экан, бўлди. Ҳасанбой энди яна ҳам кўпроқ меҳнат қилади, насиб қилса. Лекин бу жангда Ҳасанбой мағлуб бўлмади».

Иқболжон Холдаров – боксчи, терма жамоа аъзоси

«Ноҳақлик бўлгани яққол кўриниб турибди. Мен яна нима ҳам дердим. 3 раунд ҳам Ҳасанбой ака устунлик қилди».

Ҳуршид Тожибоев – профессионал боксчи

«Яхши жанг бўлди, албатта. Ҳасанбойнинг ҳаваскор боксда узоқ танаффусдан сўнг бу даражада чиройли жанг ўтказиши жуда катта ютуқ. Бу жангда Ҳасанбой ғалаба қилган».

Исроил Мадримов – профессионал боксчи

«Ҳасанбой ака жуда чиройли жанг қилди. Тўғрисини айтсам, проф боксдан қайтиб бундай юқори даражадаги жанг кўрсатади деб ўйламаган эдим. Ҳасанбой ака 2-3 раундларда устунлик қилганди. Лекин ҳакамлар ҳаммасини бошқача ҳал қилди. Мени фикримча, бу учрашувда Дўсматов ғалаба қозонди».

САРВИНОЗ РАХМОНҚУЛОВА тайёрлади.