Проводников Пакьяо билан жангнинг янги эҳтимолий санасини айтди

Руслан ушбу кўргазмали мақомдаги жанг шу йилнинг ёзида АҚШда ўтказилишига умид қилмоқда, бироқ ҳозирча ташкилотчилар томонидан бу расман тасдиқланмаган. Аслида жанг февраль ойида эълон қилинган ва унга кўра, 18 апрель куни Лас-Вегасда бўлиб ўтиши керак эди. Аммо кейин Пакьяо жамоаси сентябрь ойида Флойд Мейвезер билан реванш жангини эълон қилди. 

"Афсуски, жанг апрель ойида ўтказилмайди, лекин умид қиламанки, у июнь ойида бўлиб ўтади", - деди россиялик боксчи World Boxing News нашрига берган интервьюсида. — Мен чиндан ҳам шунга умид қиламан ва бунга ишонаман. Биз ҳаммасини тайёрладик. Рухсат беришлари биланоқ чамадонларимни йиғиштириб, ўз жамоам билан Америкага учиб кетаман.

Ўтган йили профессионал рингга қайтган ва шунинг баробарида 49 ёшли Мейвезерни ҳам катта боксга қайтармоқчи бўлган 47 ёшли Пакьяодан фарқли равишда Проводников фаолиятини давом эттирмасликка қатъий қарор қилган.

"Менинг фаолиятим аллақачон тугаган. Мен бошқа ишга ўтдим ва ҳозир асосий устуворлигим - бу оилам!", - деди Проводников. — Бокс ортда қолди. Кўргазмали жанглар шунчаки томошабинларни хурсанд қилиш учун ўтказилиши мумкин, аммо жиддий равишда қайтиб, фаолиятимни қайта бошлаш учун эмас. Ҳар нарсанинг ўз вақти бор".