Қамаши туман ҳокими чемпионларни 5 млн сўм пул мукофоти билан тақдирлади

Миллий кураш, каратэ, оғир атлетика, бокс, волейбол, дзюдо, футбол ва бошқа спорт турларидан туман ёшлари вилоят, республика ва жаҳон миқёсида ўтказилаётган мусобақаларда муносиб иштирок этмоқда. 

Хусусан, оғир атлетика спорт турида ёшларимизнинг эришаётган натижалари қувонарли. 2019 йилнинг март ойида АҚШ да бўлиб ўтган ўсмирлар ва қизлар ўртасидаги оғир атлетика бўйича жаҳон чемпионати миллий терма жамоа учун муваффақиятли ўтгани билан эсда қолди. Вакилларимиз жами 16 та медал жамғаришди. 

Жаҳон чемпионатида қамашилик Нигора Абдуллаева 3 та олтин медални қўлга киритган бўлса, Турсуной Жабборова 1 та олтин ва 2 та кумуш медалларни ўзиники қилиб олганди. 

Шунингдек, яқинда Корея Халқ Демократик Республикасининг Пхеньян шаҳрида оғир атлетика бўйича ўсмирлар ва ёшлар ўртасида Осиё чемпионатида иштирок этиб келган спортчиларимиз юқори натижаларни қайд этишди. Ўз вазн тоифасида Т. Жабборова тенгсиз бўлган бўлса, Н.Абдуллаева кумуш медални қўлга киритдилар. Албатта, буларнинг барчаси қувонарли натижалар. 

Жаҳон ва Осиё чемпионатларида кўрсатилган ушбу натижалар қизларимизга Олимпиада йўлланмаси учун муҳим рейтинг очколарини келтиргани спортчи қизларимиз олдига янада юксак марраларни қўймоқда.  

Қамаши туман ҳокимлигида Токио олимпиадасига йўлланма олишда яхши имкониятларга эга бўлган спортчилар Т.Жабборова ва Н.Абдуллаева ва ёш спортчилар билан туман ҳокими Шерали Санаев учрашуви бўлиб ўтди. Учрашувда туман ҳокими ёшларга чидамли ва сабрли бўлиш кераклиги тўғрисида гапирди. Юртимизда спортга қаратилаётган эътибордан унумли фойдаланиш зарурлигини ҳам айтиб ўтди. 

Жаҳон ва Осиё чемпионатлари совриндорлари Нигора Абдуллаева ва Турсуной Жабборовага туман ҳокимлиги томонидан 5 миллион сўмлик мукофот пуллари берилди.

- Ҳар бир инсон юракдан меҳнат қилса албатта, ўз ўйлаган натижасига эришади, - дейди жаҳон чемпиони Турсуной Жабборова. 5 миллион сўм пул мукофоти ва туман ҳокимимизнинг ишончлари учун ташаккур айтаман. Асосий мақсадим бўлган олимпиада йўлланмасини қўлга киритиш учун тинимсиз меҳнат қиламан.

Фахриддин ЧОРИЕВ, Қамаши туман Жисмоний тарбия ва спорт бўлими инспектори