"Қарор қабул қилдим". Ғофур Раҳимов мурожаат билан чиқди

«Сўнгги бир ярим йил давомида ташкилотимиздаги вазиятни барқарорлаштириш йўлида босилган қадамларни маъқуллаб, қўллаб-қувватлаб турганингизни доимо ҳис қилиб турдим», — дейилади баёнотда.

Ғофур Раҳимовнинг қайд этишича, боксдаги ислоҳотларнинг оғир даври «сиёсий асосланган ёлғон айбловларга қарши унинг шаъни ва қадр-қимматини ҳимоя қилиш»га қаратилган жараёнлар билан бир вақтга тўғри келиб қолди. 

«Ушбу жараёнлар менинг номимни ёлғон айбловлардан тозалашни тезлаштириш учун суд ва бошқа йиғилишларда мунтазам қатнашишимни талаб қилади. Чуқур қайғу билан AIBA президенти лавозимидан зудлик билан истеъфо бериш ҳақида қарор қабул қилдим», — дея хулоса қилинган Раҳимовнинг мурожаатида.

Ғофур Раҳимов 2018 йил ноябрида AIBA раҳбарига айланган эди. AIBA раҳбарлигига сайловлар арафасида АҚШ Молия вазирлигининг Хорижий активлар устидан назорат бўйича департаменти Ғофур Раҳимов санкция рўйхатига киритган эди.

Ўшанда Халқаро олимпия қўмитаси (ХОҚ) Ғофур Раҳимовни AIBA раҳбарлигига унинг номзоди илгари сурилиши бокснинг Олимпия ўйинларидаги мақомига салбий таъсир қилиши мумкинлиги ҳақидаги огоҳлантиргани маълум бўлганди.