Қаршида Ўзбекистон кубогининг тантанали очилиш маросими бўлиб ўтди

Мусобақада Қорақалпоғистон Республикаси, барча вилоятлар ҳамда Тошкент шаҳридан келган жами 605 нафар дзюдочи иштирок этяпти. Бугун мамлакат кубогининг илк куни тантанали очилиш маросими ўтказилди. Унда Қашқадарё вилояти Спорт бошқармаси бошлиғи Ваҳоб Рўзиев, Ўзбекистон дзюдо федерацияси раиси ўринбосари Зафар Қаҳрамонов ва бошқа мутасаддилар иштирок этишди. 

Тадбирда Ваҳоб Рўзиев сўзга чиқиб, юртимизда барча спорт турлари қатори дзюдога ҳам катта эътибор қаратилаётгани, бу биринчи галда жамиятда соғлом турмуш тарзини янада қарор топтириш учун хизмат қилаётганини урғулади ва иштирокчиларга муросасиз кечаётган беллашувларда омад тилади. 

Ёш спортчиларнинг кўргазмали чиқишлари "Геолог" аренасига йиғилган томошабинларнинг олқишига сазовор бўлди. Шундан сўнг Ўзбекистон Республикаси давлат мадҳияси янграб, финал баҳсларига старт берилди.