Qatar Masters. Нодирбек Абдусатторов 123-ўринда, энг яхши кўрсаткич Афруза Ҳамдамовада

Мукофот жамғармаси 94 200 АҚШ долларини ташкил қилувчи Qatar Masters турнирида жами 53 нафар ўзбекистонлик шахматчи А ва В гуруҳида баҳсларга киришишган. Кучлилар жам бўлган Open турнирида 15 нафар шахматчимиз совринли ўринлар учун кураш олиб боришяпти. 

Афсуски, турнирда иккинчи рақам остида таснифланган Нодирбек Абдусатторов (2777) илк даврадаги мағлубиятдан кейин яна юта олмади. Гроссмейстеримиз қора доналарда БАА вакили Омран Ал Ҳосани билан дурангга рози бўлди. Биринчи турда ютқазган яна бир гроссмейстеримиз Нодирбек Якуббоев (2668) ниҳоят 2-турда шотландиялик Абдулла Мурод (2321)ни таслим эта олди. 

Шамсиддин Воҳидов (2681) оқ доналарда ўйнашига қарамай, ҳиндистонлик Кришна Гутам (2466) билан дуранг қайд этди. Ёшлар ўртасида жаҳон чемпиони Афруза Ҳамдамова (2354) 1-турда қора доналарда ҳаракат қилганига қарамай, италиялик гроссмейстер Лоренцо Лодики (2564)ни мағлуб этганди. Кеча у россиялик таниқли гроссмейстер Владислав Артемьев (2701) билан дуранг ўйнади.      

Турнирнинг биринчи тартиб рақамли шахматчиси ҳиндистонлик Аржун Эргаиси (2801) 1-турда ҳамюртимиз Муҳаммадали Абдураҳмонов (2395)ни енгганди. Кеча у қозоғистонлик гроссмейстер Муртаз Кажгалеев (2488) билан муроса йўлини танлади. Эронлик Парҳам Мақсудлу (2703) яна очко йўқотди. У бу сафар ватандоши Артин Ашрафни юта олмади. Ўтган ҳафта Тошкентдаги халқаро турнир ғолиби Ниҳал Сарин (2676) иккинчи учрашувда ҳам ғалаба қозонди. Кеча ҳиндистонлик шахматчи ватандоши Сриҳарини мағлубиятга учратди. 

Иккинчи турда ёш гроссмейстерларимиздан Муҳиддин Мадаминов (2501) ва Абдумалик Абдусалимов (2536), халқаро мастерлар Ортиқ Ниғматов (2447) ҳамда Саидакбар Сайдалиев (2473) ғалабага эришиб, очколарини 1,5 тага етказиб олди. 

Кучлилар гуруҳида қатнашаётган ҳамюртларимиздан Муҳаммадзоҳид Суяров, Ҳумоюн Бегмуратов, Алмас Раҳматуллаев, Муҳаммадали Абдураҳмонов рақиблари билан дурангга имзо чекишди. Баҳром Бахриллаев, Нилуфар Якуббоева ва Асроржон Омонов рақибларига имкониятни бой беришди. 

Иккинчи турдан сўнг шов-шувли тарзда Нодирбек Абдусатторовни мағлубиятга учратган Реза Маҳдави қўшимча кўрсаткичларга кўра ҳамон 1-ўринни эгаллаб турибди. Яна 15 нафар шахматчи ҳам юз фоизлик натижа қайд этган. Ҳамюртларимиз орасида энг юқори ўрин ҳозирча Афруза Ҳамдамовага тегишли. Ёшлар ўртасида жаҳон чемпиони 1,5 очко билан қўшимча кўрсаткичларга кўра 17-ўринни эгаллаб турибди. Яъни, 1,5 очколиларнинг энг яхши кўрсаткичи айнан Афрузада! Ярим очкога эга Нодирбек Абдусатторов 123-поғонадан жой олган.