Qatar Masters. Нодирбек Абдусатторовда кетма-кет учинчи ғалаба. Қолган шахматчиларимиздачи?

Мукофот жамғармаси 94 200 АҚШ долларини ташкил қилувчи Qatar Masters турнирида жами 53 нафар ўзбекистонлик шахматчи А ва В гуруҳида баҳс олиб боряпти. Кучлилар жам бўлган Open турнирида 15 нафар шахматчимиз совринли ўринлар учун курашяпти. 

Турнирда иккинчи рақам остида таснифланган Нодирбек Абдусатторов (2777) кетма-кет учинчи ғалабасини қўлга киритди. У 5-турда оқ доналарда ҳиндистонлик Аюш Шарма (2466)ни мағлубиятга учратди. Яна бир гроссмейстеримиз Нодирбек Якуббоев (2668) кетма-кет учта ғалабадан кейин очко йўқотди. Қора доналарда ҳаракат қилган Якуббоев италиялик Лоренцо Лодики (2564) билан дуранг ўйнади. 

Шамсиддин Воҳидов (2681) қора доналарда ҳиндистонлик Пранеш (2582) билан муросага келди. Ёшлар ўртасида жаҳон чемпиони Афруза Ҳамдамова (2354) мўғулистонлик Ган-Эрдене Сугар (2437) билан дуранг қайд этди. Ёш гроссмейстеримиз Абдумалик Абдусалимов (2536) қора доналарда ўйнашига қарамай, Тошкентдаги "Президент Кубоги" турнири ғолиби Ниҳал Сарин (2676)дан очко тортиб олди. Ушбу баҳсда кучлар тенг келди. 

Турнирнинг биринчи тартиб рақамли шахматчиси ҳиндистонлик Аржун Эргаиси (2801) 5-турда ватандоши Шеҳар Гангули (2578)ни енгди. Эронлик Парҳам Мақсудлу (2703) қора доналарда ҳаракат қилганига қарамай, ҳиндистонлик Дингра Адитяни мағлубиятга учратди. 

Бешинчи турда ёш гроссмейстеримиз Муҳиддин Мадаминов ҳинд шахматчиси Ажай Сантошдан, Саидакбар Сайдалиев, Муҳаммадали Абдураҳмонов ва Алмас Раҳматуллаев мос равишда ҳиндистоник рақиблари Ваз Этан, Анкит Рай ҳамда Вишал Виваандан устун келишди. Ортиқ Ниғматов (2447) ҳиндистонлик Леон Мендонка (2642)га, Баҳром Бахриллаев Срихарига ютқазди. Кучлилар гуруҳида қатнашаётган ҳамюртларимиздан Муҳаммадзоҳид Суяров, Асроржон Омонов, Ҳумоюн Бегмуратов рақиблари билан дуранг ўйнашди. Нилуфар Якуббоева бу турда ҳам мағлубият аламини тотиб кўрди. Нилуфар барча учрашувларда рақибларига ютқазган. 

Олтинчи тур олдидан арманистонлик гроссмейстер Шант Саргсян 4,5 очко билан қўшимча коэфицентларга кўра пешқадамлик қиляпти. Ҳиндистонлик Мурали Картекиян ҳисобида ҳам 4,5 очко бор. Олти шахматчи 4 очко билан 3-8 ўринларни банд этган. Йигирма бир нафар шахматчи 3,5 очкодан жамғарган. Улар орасида ҳамюртларимиз Шамсиддин Воҳидов, Абдумалик Абдусалимов, Нодирбек Якуббоев, Муҳиддин Мадаминов, Нодирбек Абдусатторов ҳам бор. Улар орасида Абдусалимов нисбатан юқорироқ - 16-ўринни эгаллаб турибди. 

Нодирбек Абдусатторов 49-поғонадан 28-ўринга кўтарилиб олди. Саидакбар Сайдалиев ва Алмас Раҳматуллаев 3 очкодан тўплаб, мос равишда 40 ва 52-ўринларда боришмоқда. Бугун турнирда дам олиш куни сифатида эълон қилинган. 

Эртага 6-турда Нодирбек қора  доналарда болгариялик Аркадий Найдич (2636)га қарши баҳс олиб боради. Шамсиддин Воҳидов Лодики Лоренцо, Абдумалик Абдусалимов арманистонлик Хайк Мартиросян, Нодирбек Якуббоев эса россиялик Иван Землянски, Муҳиддин Мадаминов ҳиндистонлик Нараянанга қарши баҳс олиб боради.