Қатар терма жамоаси ўқув-машғулот йиғини учун Тошкентга келди ФОТОРЕПОРТАЖ

Ислом Каримов номидаги Тошкент халқаро аэропортида қатарлик дзюдочилар делегациясини Ўзбекистон дзюдо федерацияси мутасаддилари кутиб олишди. Бугундан Қатар ва Ўзбекистон дзюдо терма жамоаларининг қўшма машғулоти бошланади. 

Қатар барча спорт турларида ривожланишга интилаётган, нуфузли мусобақаларга аъло даражада мезбонлик қилаётган нафақат Осиёнинг, балки жаҳоннинг илғор мамлакати ҳисобланади. Табиийки, дзюдога ҳам катта эътибор қаратилмоқда. Шу йил январь ойида Доҳа шаҳрида "Мастерс" сериясига кирувчи мусобақанинг кўтаринки руҳда, жаҳон талаби даражасида ўтказилгани ҳам фикримизга исбот бўла олади.

Маълумот учун, қатарлик дзюдочилар орасида энг юқори рейтингга -66 кг вазн тоифасидаги Айюб Элидрисси эга бўлиб, у айни пайтда 577 очко билан 79-поғонадан жой олган. -81 кг вазндаги Морад Земоури 469 очко билан 85, 440 очкога эга шу вазн тоифасидаги Ҳалил Ребаҳи 89-ўринни банд этган.