Қиличбозларимиз Жаҳон кубоги босқичларида ғолиб ва совриндор бўлишди

Аҳамиятлиси, унда иштирок этаётган ўзбекистонлик "мушкетёр"лар совринли ўринларни эгаллашмоқда.

Жумладан, Болгариянинг Пловдив шаҳрида ўтказилаётган турнирда саблячимиз Зуҳриддин Қодиров яккалик дастурида кумуш медални қўлга киритди. У финалда америкалик Моррил Уильямга 15:11 ҳисобида мағлуб бўлган.

Қизлар ўртасидаги яккалик баҳсларида эса Самира Шокирова бронза медалига эга чиқди. У ярим финал босқичида франциялик Тори Тосканга имкониятни бой берган - 14:15.

Қувонарлиси, Пловдивдаги сабля турнирида қизларимиз жамоавий дастурда биринчи, йигитларимиз эса учинчи ўринни эгаллашди.

Фернарда Эррера, Гулистан Пердебаева, Наргиза Жаксибаева ҳамда Самира Шокировадан иборат қизлар терма жамоамиз финалда Франция устидан 45:43 ҳисобида ғалаба қозонди.

Йигитлар терма жамоамиз эса бронза медали учун кечган баҳсда Венгрияни 45:39 ҳисобида доғда қолдирди. Турнирда термамиз таркибида Исломбек Абдазов, Сардор Абдукаримбеков, Азизбек Даулетназаров ҳамда Зуҳриддин Қодиров ҳаракат қилди.

Бундан ташқари, Хорватиянинг Загреб шаҳрида ўтказилган рапира йўналишидаги турнирда йигитлар терма жамоамиз жамоавий дастурда учинчи ўринни эгаллади. Термамиз ярим финал беллашувида Италияга мағлуб бўлган. Жамоа таркибида эса Фозилхўжа Алимов, Илёсбек Марипжонов, Радмир Семенеев ва Улуғбек Усмонов иштирок этди.