Қизларимиз Осиё Кубогида фахрли иккинчи ўринни эгаллашди

Яқинда чим устида хоккей бўйича эркаклар терма жамоамиз Қирғизистонда бўлиб ўтган халқаро турнирда учинчи ўринни қўлга киритиб, соврин билан ортга қайтганди. Бу гал эса аёллар терма жамоамиз совриннинг қийматини янада оширишган ҳолда, Сингапурда ташкил этилган Осиё Кубогида фахрли иккинчи ўринга сазовор бўлиб, кумуш медаль билан тақдирланди.

Сингапур, Хитой Тайпейи, Бангладеш, Шри Ланка, Гонгконг ва Ўзбекистон термалари иштирок этган мусобақада ҳамюртларимиз фақат майдон эгаларига имкониятни бой беришди, Хитой Тайпейи билан эса ташаббусга эга бўлган ҳолда дуранг натижа билан кифояланишди.

Мазкур мусобақа 2020 йилги Японияда бўлиб ўтадиган Осиё ўйинлари финалига саралаш учун йўлланма бериши билан ҳам аҳамиятли эди. Хоккейчи қизларимиз бунинг уддасидан чиқишди – Осиё ўйинлари саралаш учрашувларига йўлланма олишди.

Эътиборли жиҳати, терма жамоамиз аъзоси Сабина Адизова мусобақанинг энг яхши ўйинчи деб топилди ва махсус мукофот билан тақдирланди.

Ҳамюртларимиз иштирокидаги ўйинлар натижалари:

Ўзбекистон – Гонконг – 5:0

Голлар: Комила Адизова (24), Шаҳризода Қаҳрамонова (38, 59), Зулфияхон Ҳасанбоева (44), Гулруҳ Рамазонова (51).

Сингапур – Ўзбекистон – 1:0

Ўзбекистон – Баҳрайн – 6:0

Голлар: Зулфия Ҳасанбоева (2, 15), Сабина Адизова (17), Гулруҳ Рамазонова (30, 45), Шаҳризода Қаҳрамонова (54).

Хитой Тайпейи – Ўзбекистон – 2:2

Голлар: Комила Адизова (7, 52)

Ўзбекистон – Шри-Ланка – 8:0

Голлар: Зулфияхон Ҳасанбоева (13, 14, 59), Комила Адизова (19), Шаҳризода Қаҳрамонова (34, 54), Сабина Адизова (57), Истамой Пиракова (58).