Қорақалпоғистон Республикасида велосипед спорти федерациясига янги раис сайланди

Ташриф доирасида Нукус шаҳридаги Ёшлар марказида Республикада велосипед спорти ривожини янги босқичга олиб чиқиш масалаларига бағишланган йиғилиш бўлиб ўтди. Унда ҚР жисмоний тарбия ва спорт ишлари вазири Қайратбай Байниязов, ҚР Вазирлар Кенгаши раисининг биринчи ўринбосари Нуруллан Ерлепесов, Ўзбекистон велосипед спорти федерацияси бош котиби Козим Ўринбойхўжаев, федерация маслаҳатчиси Фарруҳ Худойқулов, МОҚнинг ҚРдаги вакили Сансизбай Сапарниязов, Республика спортчи ва мураббийлари иштирок этишди.

Йиғилиш кун тартибидан Қорақалпоғистон Республикаси велосипед спорти федерациясига раис, раҳбарият таркиби, шунингдек, жамоа бош мураббийини сайлаш каби масалалар ўрин ўрин олди. Якунда ҚР Вазирлар Кенгаши раисининг биринчи ўринбосари Нуруллан Ерлепесов Республика велосипед спорти федерацияси раиси лавозимига сайланган бўлса, Ерназар Хожаназаров Ижрочи директор сифатида фаолият олиб борадиган бўлди. Шунингдек, жамоа бош мураббийлиги Фазил Арисланбаевга топширилди.

Йиғилиш давомида ҚРда велосипед спортини ривожлантириш, ушбу ҳудуд спортчиларининг шуғулланишлари учун барча шарт-шароитларни яратиш, моддий-техник базани яхшилаш, ёш спортчилар орасида селекцион мусобақалар ўтказиш орқали уларни Ханчжоу-2022 Осиё ўйинлари ва Париж-2024 Олимпия ўйинлари саралашига жалб қилиш, Тошкент-2025 ёшлар Осиё ўйинлари учун иқтидорли спортчиларни танлаб олиш, каби масалалар атрофлича муҳокама қилинди.