Қорақалпоқ ёшлари орасида оммавий спорт тарғиботи янада кучаймоқда

МОҚ вакили Мирсардор Алимов бир неча кун Қорақалпоғистонда хизмат сафарида бўлиб, Республиканинг бир нечта туманларида оммавий спорт тарғиботи бўйича қатор ишларни амалга оширди.

МОҚ вакили даставвал “Спортни сев, спорт билан яша!” оммавий мусобақасининг март ойлиги якуни бўйича ташкил қилинган тадбирда иштирок этди. Ундан сўнг 2003 йил ва ундан кичик ёш тоифасида ташкил қилинган бокс бўйича Қорақалпоғистон чемпионатида бўлди. Ушбу мусобақалар якунида ғолиб ва совриндорларга МОҚнинг эсдалик совғалари тақдим қилинди.

Шундан сўнг Мўйноқ ёшлари билан оммавий мусобақалар ташкил қилинди. «Талли ўзек» маҳалла фуқаролар йиғинида жойлашган БЎСМда Мўйноқ ёшлари ўртасида югуриш, ерга таянган ҳолатдаги машқ (отжимание), узунликка сакраш, турникда тортилиш, волейбол каби мусобақалар бўлиб ўтди. Унда 500 нафардан ортиқ иштирокчи ўз омадини синаб кўрди. Тадбир якунида ушбу БЎСМда мўйноқлик ёшларнинг шуғулланиши учун 50 миллион сўмлик спорт инвентарлари тақдим қилинди.

Шундан сўнг Қорақалпоғистоннинг икки умидли ёш спортчиларининг хонадонига ташриф буюрилди. Улардан бири каратэчи Гулсанам Оразбаева бўлиб, у Бўзатов туманида истиқомат қилади. Туман ҳокимлиги мутасаддилари, Жисмоний тарбия ва спорт вазирлиги ходимлари билан унинг ижтимоий вазияти ўрганилиб, якунда уйи таъмирлаб бериладиган бўлди.

Мутасаддилар ташриф буюрган навбатдаги манзил Хўжайли туманида истиқомат қилувчи курашчи Хадича Нажимованинг оиласи бўлди. Тадбирда Хўжайли тумани ҳокими Женис Ермашев ҳам иштирок этди. Ташриф давомида унинг ҳам оилавий шароити ўрганилиб, МОҚ ва ҳокимликнинг совғалари тақдим қилинди.