Қўшработдаги шахмат мусобақасига жаҳон чемпиони ташриф буюрди

“Нуроний”ʼ жамғармаси туман бўлими ва Ўзбекистон ёшлар иттифоқи туман кенгаши 14 ёшдан 60 ёшгача бўлган ҳаваскор шахматчилар ўртасида мусобақа ташкил этишга қарор қилди ва бу ташаббус туман аҳли томонидан қўллаб-қувватланди.

Мусобақага ота-боболари қўшработлик бўлган, томирида шу элнинг бахши шоирлари ва полвонлари қони оқаётган шахмат бўйича жаҳон чемпиони Жавоҳир Синдоров ҳам таклиф этилди.

Бугун жаҳон тан олган ёш гроссмейстерни болалигидан шахмат оламига олиб кирган, уни юксак ғалаба ва марралар сари илҳомлантирган бобоси – Комил Синдоров ҳамроҳлигида ота юртига келган Жавоҳир қўшработлик ёшларга ўз ютуқлари сири ҳақида гапириб берди, улар учун маҳорат машғулотлари ўтди.

Шунингдек, жаҳон чемпиони бир вақтнинг ўзида ўндан ортиқ иштирокчи билан дона сурди.

Мусобақа ғолиблари ташкилотчилар томонидан муносиб тақдирланди.