Қосимжоновда ғалаба, 15 ёшли Абдусатторов кучли гроссмейстерни мағлуб этди

Кеча куннинг иккинчи ярмида мусобақанинг еттинчи  тур учрашувлари ўтказилди. Турнирда биринчи рақам остида сараланган Рустам Қосимжонов ушбу турда қора доналарда ҳаракат қилди. 17-жаҳон чемпиони қозоғистонлик халқаро гроссмейстер Ануар Исмагамбетовни мағлубиятга учратди. 

15 ёшли халқаро гроссмейтеримиз Нодирбек Абдусатторов ҳам ажойиб ғалабага эришди. У қозоғистонлик гроссмейстер Пётр Костенкони таслим этди. Турнир жадвали пешқадами қозоғистонлик Ринат Жумабоев ҳамюртимиз Нодирбек Ёқуббоевдан устун келди ва карвонбошилигини мустаҳкамлади. 

Яна бир ёш гроссмейстеримиз Жаҳонгир Воҳидов оқ доналарда ўйнашига қарамай, қозоғистонлик гроссмейстер Муртаз Кажгалеевга имкониятни бой бериб қўйди. Тажрибали гроссмейстеримиз Марат Жумаев эса шогирди Ортиқ Ниғматовни енгди. 

Еттинчи турдан сўнг мусобақа жадвалида Ринат Жумабоев 5,5 очко билан якка пешқадам бўлиб турибди. Рустам Қосимжонов ва Нодирбек Абдусатторов 5 очко билан кучли учликдан жой олишган. Никита Хорошев, Муртаз Кажгалеев ва Марат Жумаев ҳисобида 4 тадан очко бор. 

Бугун 8-турда Абдусатторов оқ доналарда Ринат Жумабоевга қарши ҳаракат қилади. Агар 15 ёшли гроссмейстеримиз ушбу баҳсда ғалаба қозона олса, у ҳолда чемпионлик учун жуда катта қадам ташлайди. Рустам Қосимжонов эса бу турда Никита Хорошевни синовдан ўтказади.