Қозоғистон XXXII Бутунжаҳон қишки Универсиадада 103 спортчи билан қатнашади

23 январга қадар давом этадиган ушбу комплекс мусобақада дунёнинг 57 давлатидан 2000 нафарга яқин спортчи 11 спорт турида 96 та медаллар жамланмаси учун баҳсларга киришади. Универсиадада Қозоғистон делегацияси 103 нафар спортчи билан иштирок этади. Улар биатлон, шорт-трек, чанғи пойгаси, фигурали учиш, фристайл, тоғ чанғи спорти, эркаклар ва аёллар хоккей турнирларида медаллар учун баҳс олиб боришади. 

Маълумот учун, Қозоғистон терма жамоасининг қишки Универсиададаги энг яхши натижаси 2017 йили Алматида ўтган мусобақага тўғри келади. Қўшниларимиз ўз уйларидаги Универсиадада 11 та олтин, 8 та кумуш, 17 та бронза, жами 36 та медаль билан умумжамоа ҳисобида 2-ўринни банд этишганди. 

XXXII Бутунжаҳон қишки Универсиадада Ўзбекистон спорт делегацияси иштирок этмайди. Бизга хабар беришларича, асосий эътибор бир ойдан сўнг Хитойнинг Харбин шаҳрида ўтказиладиган IX Қишки Осиё ўйинларига қаратилган экан.