Қозоғистонлик теннисчи Porsche Tennis Grand Prix чемпиони + ФОТО

Porsche Tennis Grand Prix бош соврини Елена Рибакинага насиб этди. Қозоғистонлик теннис маликаси ҳал қилувчи финал учрашувида WTA рейтингида 27-поғонада борган украиналик Марта Костюкни ортиқча қийинчиликсиз мағлубиятга учратди - 6/2, 6/2. 

Елена теннисчиларнинг ўзаро учрашувларидаги ҳисоб мувозанатини ҳам тиклаб қўйди - 2:2. Бир соату 11 дақиқа давом этган баҳсда дунёнинг тўртинчи ракеткаси бўлган Рибакина ҳам, Марта ҳам биронта эйс зарбасини амалга ошира олмади. Қўшхатолар Костюкда уч баробар кўпроқ бўлди - 6 га 2. Брейклар бўйича мутлақ устунлик Еленада - 4 га 0!

Porsche Tennis Grand Prix турниридаги муваффақиятли иштирок Рибакинага 500 рейтинг очкоси ҳамда 123,480 доллар мукофот пули келтирди. Бу қозоқ теннисчисининг мавсумдаги учинчи, фаолиятидаги саккизинчи соврин бўлди. 

Елена Рибакина финалга қадар россиялик Вероника Кудерметовани 7:6, 1:6, 6:4, италиялик Жасмин Паолинини 6:3, 5:7, 6:3, дунёнинг биринчи ракеткаси, польшалик Ига Свёнтекни 6:3, 4:6, 6:3 ҳисобларида мағлубиятга учратганди.