Quantbox Chennai Grand Masters 2026. Абдусатторов ҳинд гроссмейстерини таслим этди. Гукеш ютқазди

Мукофот жамғармаси 79 500 АҚШ долларини ташкил этувчи мусобақада Ўзбекистон шарафини гроссмейстеримиз Нодирбек Абдусатторов ҳимоя қилмоқда. Ҳамюртимиз 5-турда ниҳоятда турнирдаги илк ғалабасини қўлга киритди. Нодирбек қора доналарда ўйнаганига қарамай, ҳиндистонлик гроссмейстер Ниҳал Саринни мағлубиятга учратди. 

Бу турда амалдаги жаҳон тожи соҳиби Гукеш Доммараджу мағлубият аламини тотиб кўрди. Ҳиндистонлик жаҳон чемпиони оқ доналарда ўйнаб, ватандоши Аржун Эригаисига ютқазиб қўйди. Бешинчи турнинг қолган икки партиясида томонлар дурангга имзо чекишди.   

Абдусатторов 6-турда оқ доналарда франциялик Алиреза Фирузджага қарши баҳс олиб боради. Гукеш Доммаражу қора доналарда юртдоши Пранеш билан ҳисоб-китоб қилади. 

Олтинчи тур олдидан турнир жадвалида Аржун Эригаиси ва Алиреза Фирузжа 3,5 очкодан жамғариб, қўшҳокимлик қилишяпти. Нодирбек Абдусатторов кечаги ғалабаси эвазига 3 очко билан соф 3-ўринга кўтарилиб олди.