Quantbox Chennai Grand Masters 2026. Абдусатторов иккита турда қандай натижа қайд этди? Бугун Гукешга қарши ўйин!

Мукофот жамғармаси 79 500 АҚШ долларини ташкил этувчи мусобақада Ўзбекистон шарафини гроссмейстеримиз Нодирбек Абдусатторов ҳимоя қилмоқда. Ҳамюртимиз 1-турда америкалик Ҳанс Мок Ниеманн билан дуранг ўйнаган эди. 

Иккинчи ва учинчи турларда ҳам унинг иштирокидаги партияларда муроса кўчаси танланди. Нодирбек аввалига ҳиндистонлик Аржун Эригаиси, кейин эса 3-турда яна бир мезбон шахматчи Пранеш билан дурангга имзо чекди. 

Бугун Абдусатторов 4-турда амалдаги жаҳон тожи соҳиби Гукеш Доммаражуга қарши баҳс олиб боради. Шу кунгача шахматчилар ўзаро 17 маротаба тўқнаш келишган. Нодирбек 3, Гукеш 2 учрашувда ғалабага эришган. Қолган 12 та партияда дуранг натижа қайд этилган. 

Бугунги партиялар бизнинг вақт билан соат 14:30да бошланади. Тўртинчи тур олдидан турнир жадвалида франциялик Алиреза Фирузжа 2,5 очко билан якка пешқадамлик қилмоқда. Аржун Эригаиси 2 очко билан иккинчи ўринни банд этган бўлса, Ниҳал Сарин, Дмитрий Андрейкин ва Нодирбек Абдусатторов ҳисобида 1,5 очкодан бор. Гукеш 1 очко билан 7-ўриндан жой олган.